Un millón de euros para apoiar iniciativas de promoción TIC sen arela de lucro
xoves, 31 de marzo do 2011
- A primeira edición do Congreso de TADEGA para a promoción das redes sen atrancos para todas e todos os cidadáns
Arredor dun millón de euros será a contía
designada pola Secretaría Xeral de
Modernización para apoiar e garantir no futuro inmediato o traballo de
divulgación tecnolóxico-dixital que se despregue na nosa terra sen arela de beneficio
económico. As axudas, achegadas en réxime de concorrencia competitiva, irán
dirixidas a afianzar o desenvolvemento das actividades de difusión TIC de todo
tipo de fundacións, corporacións, asociacións ou ONGs. A resolución das
subvencións, que se pode ver no
Diario Oficial de Galicia deste 31 de marzo, abrangue axudas a eventos de
promoción e difusión de redes e demais recursos tecnoloxico-dixitais (xornadas,
sesións de demostración práctica do uso de Internet, relatorios ou congresos de
profesionais ligados á difusión das novas tecnoloxías).
Asemade, contempla axudas para a adquisición dos
equipos informáticos precisos para o impulso da Sociedade do Coñecemento nas
entidades de interese social e sen arela de lucro inscritas no Rexistro Único
de Entidades Prestadoras de Servizos Sociais, da Consellería de Traballo e
Benestar. Estas subvencións están cofinanciadas polo Fondo Europeo de Desenvolvemento
Rexional, FEDER, ficando o prazo aberto para as solicitudes a partir de mañá,
pudendo levarse a cabo no Rexistro Electrónico da Xunta.
Segundo engade Modernización, estes apoios
orzamentarios “súmanse á liña de subvencións
publicada o martes 28 na que se establecían as bases destinadas a subvencionar a incentivar a creación de novos proxectos do sector TIC galego por un
importe de 2.600.000 euros”.