Un libro sobre turismo e comunicación 2.0 subliña a falta de estratexia nas redes sociais
luns, 21 de novembro do 2016
- A investigadora Mabel Míguez da Universidade de Vigo
Segundo daba conta a
Universidade
de Vigo (UVigo) o pasado venres, as
profesionais
e os profesionais
da comunicación dixital no eido turístico poderán beneficiarse das
conclusións que veñen de tirar diversos investigadores baixo o
proxecto ComTur
2.0 Uso e influencia de los social media y la comunicación 2.0 en la
toma de decisiones turísticas.
Neste
estudo, no que participaron a
profesora de Ciencias Sociais e da Comunicación da
UVigo Mabel
Míguez e
outros docentes de
universidades españolas
saliéntase que os
principais destinos españois defínense
pola “falta de estratexia na comunicación que se fai nos medios en
liña”.
O dito proxecto, dirixido pola profesora da
Universitat
Rovira i Virgili (URV)
Assumpció Huertas e desenvolvido entre os anos 2013 e 2015,
prolongouse neste 2016 coa publicación de La
comunicación de los destinos turísticos y sus marcas a través
de los medios sociales, no que investigadores da URV e das
universidades de Vigo, Lleida, Málaga, Cardiff e Surrey dan conta da
análise realizada sobre o uso que fan de Facebook, Twitter, Flickr
ou Youtube un total de 38 destinos turísticos de cinco autonomías,
Cataluña, Galicia, Andalucía, Canarias e a Comunidade de Madrid.
Segundo Míguez
moitos dos destinos contan con perfís en varias redes, pero falla o
xeito en que se usan: o punto de vista da xestión de marca e dos
seus valores. Se ben as redes sociais poden non resultar decisivas á
hora de “elixir destino en termos amplos”, si o son no intre de
“determinar o lugar concreto ao que se viaxa, no que se aloxa ou
que itinerarios fai”. Amais disto, “a maioría dos destinos
explotan os mesmos valores de marca, co cal non hai diferenciación e
desaproveitan as oportunidades que ofrecen as redes sociais para
fomentar a interactividade e o diálogo co receptor”, engade
Míguez.
No caso concreto de
Galicia, as Rías Baixas como gran destino litoral, Santiago de
Compostela como cidade patrimonial, Vigo como gran municipio,
Sanxenxo como municipio do litoral, Monforte de Lemos como destino de
interior e Ourense como cidade media constitúen, xunto coa propia
comunidade autónoma, os sete focos sobre os que este proxecto
centrou a súa análise onde, como apunta Míguez, “hai moita
disparidade no uso dos social media”.