Un informático italiano publica unha novela de ciencia ficción escrita dende o seu móbil

O sistema de edición Lulu permite a calquera publicar o seu propio libro grazas á impresión baixo demanda, o que aproveitou o italiano Roberto Bernocco para sacar o que din que é o primeiro libro escrito nun móbil.
Así, durante 17 semanas, Bernocco empregou o seu móbil Nokia 6630 para escribir toda unha novela de ciencia ficción de 384 páxinas aproveitando o tempo que pasaba no tren nos seus desprazamentos diarios ó traballo. Aproveitou as opcións de texto preditivo (T9) do seu móbil para escribir rápido e sen empregar as clásicas abreviaturas típicas das mensaxes SMS, aínda que hai que recoñecer que o texto destaca polos seus parágrafos curtos.
O libro Compagni di Viaggio (Compañeiros de viaxe) pódese adquirir xa na web canadense Lulu, a distintos prezos (24,83 dólares en tapa dura, 17,38 dólares en tapa branda, 16,14 dólares en edición de peto e 2,47 dólares en formato electrónico) e está dirixido a mozos segundo o seu propio autor.