Un estudo certifica o potencial da publicidade en galego e máis o seu pulo nas redes
martes, 17 de setembro do 2013
A empresas como Gadis
ou R vailles ben polo servizo que ofrecen ou porque apostan polo
galego? Pois case con toda probabilidade polas dúas cousas. Así
nolo recorda o profesor Alberto Pena dende o campus de Pontevedra a
través dun traballo no que defende a eficacia comercial de falarmos
aos nosos clientes na lingua que estes saben súa, sexan quen de
falala ou non. As cifras, de feito, non fan máis que confirmalo.
Na devandita investigación, publicada polo Consello da Cultura
Galega baixo o título Os novos horizontes da industria
publicitaria, o docente da Facultade de Ciencias Sociais e da
Comunicación da UVigo, Alberto Pena, analiza os efectos do uso das
especificidades culturais do país no ámbito comercial, incidindo na
idea de que calquera cultura que aposte por construír o seu propio
discurso publicitario será máis competitiva no mercado
internacional. Ou sexa, que a reivindicación e defensa do que unha
determinada clientela considera propia é unha boa estratexia
comercial.
Amais de Gadisa, Adegas
Martín Códax ou Pescanova, para o profesor está claro que R,
recentemente recoñecida pola Fundación Curros Enríquez pola súa
defensa do galego, é un exemplo do avance do galego como lingua
publicitaria, “e todo malia as dificultades polas que está a
atravesar a lingua nas últimas dúas décadas”, explica. Alberto
Pena explica tamén que o operador de telecomunicacións ten probas
de que a súa liña de traballo en cuestión de marketing e
comunicación resulta eficaz dende o punto de vista comercial. A
maiores, trátase tamén dunha cuestión de prestixio con respecto á
retórica de venda.
Noutro plano de cousas,
o profesor tamén sinala no seu estudo que nos últimos tempos o
sector está a experimentar, debido á crise financeira
internacional, un importante retroceso, especialmente salientábel no
caso da industria da comunicación. Segundo explica, “os
anunciantes reduciron sensiblemente o nivel de investimento
publicitario e isto está a influír nas cifras de facturación de
moitas das empresas de comunicación que hai no país, polo que a
publicidade tradicional tende a perder peso a favor da publicidade
dixital”. Ao seu xuízo, as plataformas web e as redes sociais son
en boa medida os seus novos soportes ao convertérense nos últimos
tempos no multi-medio con máis posibilidades neste sector.