Un empregado de Google faise famoso a costa de saír en fotos... cos famosos
mércores, 5 de setembro do 2007
Que teñen en común Mikhail Gorbachev, Bill
Clinton, o Dalai Lama, Muhammad Ali, Jane Fonda e Robin Williams? Amais de
seren personaxes coñecidos, todos forman parte do albume de fotografías de celebridades
que Tan Chade-Meng, enxeñeiro de Google, foi confeccionando co paso dos anos trala
obtención incesante de fotos con canto personaxe coñecido pasara pola oficina
central do buscador. Nun principio non foi doado para o señor Tan acadar as
fotografías en cuestión, pero dende o día en que logo de escoitar as sirenas de
coches de policía baixou coa súa cámara dixital e logrou fotografarse con Jimmy
Carter, as cousas foron facéndose máis sinxelas, e hoxe en día todas as persoas
que visitan a central preguntan polo enxeñeiro para quitarse a foto, algo que
xa constitúe unha parada obrigada do tour.
Na actualidade os “famosos” cos que se inmortaliza este empregado de Google abranguen diversos ámbitos da sociedade, entre os que cómpre salientar a política, os actores, e persoas que teñen recibido importantes premios como por exemplo o Nobel, e, entre todos xa suman máis de 100 os que teñen pousado á beira de Tan e perante a cámara. Lembrar ademais que os fotógrafos requiridos adoitan a ser xente que “pasa por alí” e que moitas destas imaxes foron feitas polo co-fundador da firma, Larry Page.
