Un colexio galego elixido pola Fundación Telefónica para a súa iniciativa de educación TIC
xoves, 15 de marzo do 2012
Hai presenza galega
no Proxecto
Escolas Amigas da Fundación Telefónica. Esta presenza vén da man do CEIP
Carballal, de Marín, que foi seleccionado pola entidade para participar na
terceira edición do dito proxecto educativo-tecnolóxico, a convocatoria
2012-2013, cuxa finalidade é mellorar a achega docente a través da participación
plena das novas canles e servizos dixitais. A isto cómpre engadir o seguinte
cometido: promover o intercambio e o achegamento cultural entre estudantes de
España e da outra beira do Atlántico. A achega de Latinoamérica, por certo, vén
da man de Proniño, que desenvolve o seu labor nos centros educativos procurando
a eliminación do traballo na nenez.
Segundo informa a
Fundación Telefónica, trátase da primeira vez que unha escola galega participa
na iniciativa, un certame que para que esta terceira edición dará acubillo a
escolas amigas dunha ducia países do devandito contorno xeográfico, o que supón
máis de 150 colexios, arredor de 4.500 alumnos, 230 docentes e preto de 150
voluntarios de Telefónica. O proxecto ten ademais a capacidade de estreitas
canles de comunicación entre uns centros e outros. No caso do CEIP galego, o
seu irmán docente será a Escola
Municipal Heriberto Bignolli, en Mar de Plata, Arxentina. Nun plano máis específico,
traballarán xuntas no desenvolvemento dun blog compartido que dará acubillo aos
coñecementos e impresións dos estudantes sobre o seu contorno máis próximo,
incluíndo patrimonio cultural, artístico, xeografía, marco social, etc. A
intención disto é permitir un achegamento a outras realidades sociais. “O proxecto”, informa a Fundación, “trata de promover o respecto e o coñecemento
de outras culturas, a través do contacto directo con persoas de outros países e
grazas a un traballo en colaboración presencial e dixital que permita o achado
de realidades distintas”. En total, participarán 51 alumnos do CEIP
Carballal e 40 da dita escola arxentina. Os estudantes teñen idades
comprendidas entre os 11 e os 12 anos. A actividade, que comezou este mes
coincidindo co comezo do curso en Arxentina, desenvolverase de aquí até xuño. Entre
as tecnoloxías incluídas no programa para favorecer o traballo ombro con ombro
inclúense as videoconferencias, programadas en función das súas necesidades e
inquietudes.