Un centenar de persoas participaron no encontro de blogs de moda de Con-fío en Galicia
luns, 14 de marzo do 2016
Este sábado celebrouse
na Cidade da Cultura unha xuntanza tecnolóxico-téxtil na que se
expuxeron ideas e propostas de valor para impulsar o noso sector da
moda e do deseño a través das novas canles de comunicación,
directas, inmediatas e participativas, que fornece hoxe en día a
Rede. Tratouse, máis en detalle, dun encontro de blogs de moda
inserido no marco da
exposición Con-fío en Galicia. O evento, que contou coa
presenza dun cento de bitacoreiras/os, serviu tamén para promover e
afianzar a marca Galicia no mundo botando man das redes sociais.
Fixo acto de presenza o
conselleiro de Cultura, Román Rodríguez, que convidou aos
participantes a converterse en “embaixadores da moda galega” nos
espazos virtuais que xestionan. Ademais, salientou “a súa
relevancia na creación de tendencias e a súa forza para humanizar
as marcas e achegarse a diferentes públicos”.
Tamén participou na
xuntanza María Barros, figura referencial do deseño de moda galega,
e fíxoo cunha charla sobre as claves do proceso creativo dos
deseñadores. A xuntanza tamén acolleu a rodaxe dun fashion film,
no que se amosaron diferentes pezas de deseñadores galegos. Esta
peza audiovisual, por certo, empregarase como produto de promoción
nas redes sociais.
A xornada completouse
cunha visita á mostra Con-fío en Galicia, exposición que
foi inaugurada o venres, que estará aberta ata o 11 de setembro,
unha mostra que en palabras do conselleiro “converte o Museo Centro
Gaiás da Cidade da Cultura nunha pasarela de moda na que homenaxear
un sector que conseguiu situar Galicia nun lugar de referencia no
panorama internacional: o téxtil”.