Twitter retira os ovos das fotografías de perfil predeterminadas

Relación das fotografías de perfil predeterminadas empregadas por Twitter no pasado

Dende 2010, cando alguén creaba unha conta en Twitter a fotografía do avatar que o representaba mentres non subise outra imaxe era a dun ovo, como unha divertida referencia a os paxaros que aínda non saíron do seu ovo para chiar, pero estas imaxes están a ser un problema en si mesmo, xa que a súa estética non casa ben co deseño actual de Twitter e percíbense de xeito negativo, xa que en moitos casos as contas que teñen un ovo como avatar son robots ou persoas que crean contas só para acosar a alguén, polo que non se molestan en personalizar a súa conta.
Tamén comentan dende Twitter que hai usuarios que simplemente consideraron que as imaxes dos ovos resultan graciosas, polo que non as mudaron, e precisamente por iso, e para instar aos usuarios a empregar avatares que os represente dun xeito máis persoal, veñen de mudar a imaxe predeterminada das contas de Twitter, que será unha cabeza cos seus ombros, que conseguen transmitir unha sensación tan neutra e impersoal que confían en que inste aos usuarios a cargar no sistema unha imaxe que os represente mellor.
A nova fotografía de perfil predeterminada busca ser xenérica, universal, seria, intemporal, inclusiva e carente de marca, aínda que está por ver se este cambio de deseño consegue animar aos usuarios a subir unha fotografía de perfil, ou se o único que acontecerá é que a mala sona dos ovos transmítese a unha nova imaxe.