Turismo lanza un newsletter con novas de interese para o sector

Os boletíns informativos son publicacións electrónicas que, de facerse ben e de distribuirse de forma regular, soen ser de grande utilidade para os suscriptores, ao proporcionar de xeito eficaz información moi concreta sobre un tema de especial relevancia e interese para eles.
As persoas responsables da área de comunicación da Consellaría de Cultura e Turismo, sabedoras das vantaxes deste sistema á hora de chegar ao seu público obxectivo, veñen de por en marcha un newsletter propio no que dar conta das novidades que se van dando en torno ao sector turístico do noso país.
Trátase dunha publicación electrónica que, a través da Secretaría Xeral para o Turismo, achegaralle a todas as asociacións e entidades do sector, todo tipo de información práctica sobre os proxectos, campañas, ordes de axudas e demais actividades de interese realizados por e dende esta entidade pública.
Entre as novas que destacan neste primeiro boletín informativo figura a información relativa á modificación Lei de Turismo, así como da posta en marcha de cursos de idiomas de inglés, francés e alemán a nivel básico para profesionais do turismo e da hostelería, que se desenvolverán a partir deste mes de febreiro nas Escolas de Idiomas de Galicia e centros asociados. Os cursos están financiados pola Consellería de Cultura e Turismo, a través da Secretaría Xeral para o Turismo, mediante un convenio coa Dirección Xeral de Educación, Formación Profesional e Innovación Educativa da Consellería de Educación e Ordenación Universitaria. Trátase de que os profesionais do sector poidan aplicar eses coñecementos lingüísticos ao seu campo profesional e gañar deste xeito unha maior competitividade.
No boletín electrónico, tamén se da conta do que supuxo a presenza de Galicia na Feira Internacional do Turismo de Madrid, Fitur, a onde se achegaron máis de 60.000 persoas e cuxo portal web recibiu a visita de preto de 100.000 internautas.
A posibilidade de contar cunha ferramenta de comunicación útil e práctica como é un boletín informativo electrónico, permanentemente actualizable, permitirá que sector privado e Administración estean en permanente contacto, e aproveiten ao máximo a información de ámbito turístico que manexan habitualmente.