Todo listo para a apertura de portas de Compostweets, este sábado en Santiago
xoves, 24 de febreiro do 2011
Esta semana presentouse en Santiago a xuntanza
Compostweets,
un encontro do que xa temos falado nesta web
para dar conta dos seus primeiros pasos e que se dirixe a acoller un
macrodebate arredor do fenómeno do que máis se fala dixitalmente: as redes
sociais. E todo isto, tal e como se desprende do nome da xuntanza, facendo especial
fincapé nas posibilidades de comunicación e promoción da rede Twitter, pero tamén
de Facebook. A primeira edición do Encontro Anual de Social Media en Galicia
(nome longo de Compostweets)
celébrase o vindeiro 26 de febreiro no Palacio de Congresos de Santiago de
Compostela. No acto de presentación do mesmo, celebrado na Cidade da Cultura, fíxose
fincapé na Rede 2.0 como instrumento accesible, universal, eficaz e económico
para a promoción das nosas empresas, a comunicación e, tamén, a aprendizaxe a
distancia (e-learning).
No avance do congreso participaron Alfonso
Freire (coordinador da xuntanza e membro de Lúdica7, promotora de Compostweets),
Alberto Seoane (experto en redes sociais e encargado de moderar no congreso a
mesa de debate sobre Twitter) e Beatriz González (directora xerente da Fundación
Cidade da Cultura de Galicia). Segundo contou Alfonso Freire, unha das razóns
principais que animaron a esta convocatoria de internautas 2.0 baseouse na
arela de transmitirlles a empresas e institucións galegas a importancia de
estar presentes nas redes sociais “de
xeito eficaz, coherente e profesional, coa utilidade que isto achega en canto a
promoción e difusión de marca”.
Cómpre lembrar que a xornada deste sábado 26
dará comezo a partir das 9.45 horas e que se prolongará até as 18.30, como
dixemos no Palacio de Congresos de Santiago. No acto de apertura fará acto de
presenza Carme Pardo, secretaria xeral de Turismo. Ao longo do congreso,
sucederanse as clases e mesas redondas acerca do potencial das redes sociais
como transformadoras do noso panorama empresarial, “convertendo as relacións coa sociedade en algo moito máis directo”.