The New York Times estuda volver ao modelo de pago na web

Os subscritores á edición impresa do The New York Times están a ser consultados pola cabeceira norteamericana sobre a posibilidade de ter que pagar 5 dólares ao mes para acceder á súa páxina web, ou sexa, que estarían a reconsiderar a volta ao modelo de pago que fracasou hai uns anos e que en España emulou El País con idénticos resultados.
O cambio de modelo de negocio respondería a conxuntura económica actual, que levou a que o xornal perdese 57,8 millóns de dólares o ano pasado, que no que vai de ano a súa cotización bolsista baixase un 35% e que os ingresos publicitarios na súa web caesen un 27% no primeiro trimestre do ano, polo que están a estudar posibilidades que palíen a situación, aínda que volver ao modelo de pago parecería recorrer á esmola dos lectores.
A nova estratexia da compañía podería estar en marcar un prezo que psicoloxicamente parecese moi reducido, así como deberán ponderar a evidente perda de ingresos publicitarios ao reducir o seu número de lectores en liña. Segundo parece, comezarían a experimentar co novo modelo de negocio co acceso á súa web dende dispositivos móbiles, en boa medida porque teñen menos capacidade de colocación de publicidade.