Televés presentará a súa revolucionaria tecnoloxía TForce en ANGACOM
martes, 31 de maio do 2016
A
compañía
galega Televés vén de anunciar a súa presenza (novamente) en
Colonia para dar a coñecer as súas últimas novidades tecnolóxicas
no feira ANGACOM, evento referencial centrado nos sectores da TV,
o cable e o satélite. ANGACOM
desenvolverase entre o 7 e o 9 de xuño, contando coa presenza de
medio milleiro de expositores duns 40 países (na feira en si mesma)
e con 26 paneis tecnolóxicos (no congreso). Nesta vertente
congresual do evento participará Justo Rodal, director técnico de
Televés, baixo a temática do edificio intelixente como elemento
integral das Smart Cities. No recinto feiral, na caseta D21, a
compañía de Santiago dará a coñecer o que nas súas palabras
constitúe unha “auténtica revolución tecnolóxica”.
Trátase
de TForce, a tecnoloxía desenvolvida por Televés para deseñar,
fabricar e montar compoñentes MMIC. Esta tecnoloxía, explica a
firma galega, “supón un chimpo cualitativo na miniaturización de
compoñentes electrónicos, e permitirá desenvolver unha nova
xeración de produtos practicamente sen máis fronteiras que a
creatividade dos deseñadores”.
O
primeiro froito da aplicación desta revolución tecnolóxica é a
antena Dat Boss TForce, que se dará a coñecer oficialmente na
feira. Este produto, coma os restantes da familia TForce que están
por vir, amosa importantes melloras sobre tecnoloxías previas, neste
caso “un rango dinámico até agora descoñecido e un incremento do
27% de área de cobertura”, asegurando a calidade óptima do sinal
de saída por moi difíciles que sexan as condicións de recepción,
sinala Televés.
No
alicerce destas importantes novidades está a tecnoloxía MMIC
(Monolithic Microwave Integrated Circuits), que segundo
informa a firma de Santiago é quen de superar as limitacións dos
microchips de silicio dando paso a “unha nova era no deseño de
compoñentes electrónicos”, ao permitir obter circuítos
integrados que operan na banda de frecuencia dos microondas. Estes
circuítos reducen con moito o seu tamaño, até unhas dimensións
entre 1 e 10 mm2.
“Con
TForce”, engade a empresa de telecomunicacións, “Televés entra
nunha nova dimensión, na que se elimina a dependencia dos
fabricantes de microchips e, por tanto, o límite no desenvolvemento
de produtos xa non o establece a dispoñibilidade de compoñentes no
mercado, senón a creatividade do equipo de deseño de
microelectrónica da compañía”. TForce, ademais, fortalecerá a
diversificación de Televés, ao permitirlle “desenvolver produtos
punteiros para sectores moi competitivos e esixentes, como a
aeronáutica, a sanidade, a enerxía ou o motor”.