Televés patrocina a convención de almacenistas europeos de material eléctrico
mércores, 3 de xuño do 2015
A compañía galega
Televés
vai patrocinar a edición número 60 da Convención
Xeral de EUEW, a unión europea de almacenistas de material
eléctrico. A xuntanza celebrarase en Lisboa durante os días 4 e 6
de xuño e nela concorrerán empresas e profesionais de arredor de
dúas ducias de países. Segundo avanza Televés, o eixo temático
principal do foro será o seguinte: o papel que xogan e van xogar os
almacenistas de material eléctrico nun contexto marcado pola
evolución tecnolóxica (recursos dixitais, comercio electrónico). O
epígrafe, que fala por si só do programa de actividades e temas a
tratar, é Cambio e innovación, novas tecnoloxías e novos
competidores.
Televés apoia o evento
co seu patrocinio e coa participación dunha delegación encabezada
por Manuel Martínez, director xeral de Negocio, e Matthias Dienst,
director xerente da filial en Alemaña. Este será precisamente o
país máis representado, xa que preto do 30% dos asistentes
procederán de Alemaña.
Segundo avanza a empresa
emprazada en Santiago, daranse cita en Lisboa executivos de empresas
de 17 países europeos, máis Canadá, Estados Unidos e Emiratos
Árabes. Para a compañía, apoiar este encontro xunto a outros
grandes actores internacionais do sector significa “situarse nunha
posición de liderado desde a que poder xerar importantes contactos
comerciais e oportunidades de negocio”.