Televés lanza a liña de amplificadores intelixentes SmartKom, que se configuran nun só botón
martes, 20 de decembro do 2022
A
empresa tecnolóxica Televés, con sede principal en Compostela, vén
de presentar un novo fito en materia de solucións profesionais para
as infraestruturas de comunicación de edificios e fogares. En
concreto, lanzou ao mercado o seu último desenvolvemento de produto
para a distribución de TV: SmartKom. En palabras da compañía,
trátase do “primeiro amplificador intelixente cuxa funcionalidade
pode ser xestionada cun só botón”.
Segundo
explica Televés, a gama de amplificadores SmartKom simplifica o
labor de instalación de TV en vivendas familiares, combinando as
funcións de varios elementos nun só dispositivo que subministra o
sinal completo de televisión a través dun único cable coaxial.
Ademais, Televés salienta a capacidade de resposta dos
amplificadores do dispositivo, e coa simple pulsación dun botón
configuran por si mesmos a mellor oferta de canles dispoñíbel,
xunto a un nivel de sinal perfectamente equilibrado entre eles.
Grazas a este factor de
“intelixencia integrada”, os amplificadores SmartKom están
deseñados para “un
funcionamento plug&play”,
explica
Televés, destacando que abonda con
premer en “autoprogramación” para establecer as mellores
condicións para o sinal de TV recibido. En
concreto, combina ata 32 filtros dixitais,
polo que podemos
axustar e equilibrar cada canle por separado, coa seguridade engadida
de evitar calquera interferencia da banda 4G/5G ao incorporar un
filtro SAW de alto rexeitamento.
De
querermos configuralo de xeito manual, o
acceso ao amplificador SmartKom está dispoñíbel
a través da aplicación ASuite, compatíbel
con PC, Mac, Android e iOS. O proceso permite unha configuración
individualizada en tres pasos: primeiro programando os filtros e
niveis de axuste, despois un axuste fino do nivel para unha maior
precisión, para rematar coa vixilancia das canles.
SmartKom
vén nun formato exterior, para a súa instalación no mastro
da antena, caso en que se inclúe a fonte de alimentación co
produto, ou nun formato interior, cun deseño robusto e compacto para
facilitar a instalación.