Televés equipa o Hotel Shangri-La de Doha cun avanzado sistema de información ao cliente
martes, 29 de marzo do 2016
A compañía galega
Televés, centrada en equipamento innovador de telecomunicacións,
vén de informar dun importante traballo despregado en Oriente Medio,
máis
polo miúdo no Hotel Sangri-La de Catar, onde a firma de Santiago
implantou un sistema audiovisual e de información ao cliente con 800
puntos de visualización. Segundo informa Televés, este encargo
é froito da longa e frutífera experiencia da compañía en materia
de solucións FibreData e CoaxData para o despregamento de servizos
audiovisuais no sector hostaleiro, tecnoloxías que dan acceso (con
ou sen fíos) a canles de TV procedentes de calquera plataforma (TDT,
satélite, IPTV, OTT, Vídeo Baixo Demanda).
O novo equipamento
habilitado no Sangri-La
de Doha propúxose co seguinte desafío: despregar un sistema de
IPTV (Internet Protocol Television) con todas as funcionalidades que
se agardan dun establecemento de cinco estrelas, “cen por cen
personalizado para o cliente”. Segundo engade a firma de Santiago,
“tratouse dun proxecto chave en man no que traballaron de maneira
coordinada o equipo gráfico de Televés e o integrador local para
xerar interfaces de usuario personalizados”.
Ao abeiro deste encargo,
explícase, os sistemas audiovisuais integráronse co software de
xestión hostaleira (PMS) e implantouse tecnoloxía mirror screen
(pantallas de espello) nos baños. Como resultado de todo isto, os
hóspedes poderán gozar en 800 emprazamentos diferentes “dunha
auténtica oferta de televisión á carta”, á vez que as pantallas
convértense en puntos de acceso a toda a información que poden
necesitar para gozar da súa estadía. Ou sexa, para gozar dos
servizos do hotel, da oferta local de lecer e compras, dos servizos
de transporte, etcétera. Segundo engade a firma de Santiago, “dende
os propios puntos de visualización os hóspedes poden mesmo
consultar a súa conta de gastos”.