Televés amosa no salón CABSAT os seus últimos achados en medidores de campo ou solucións de alta velocidade
luns, 11 de marzo do 2013
A
nova edición feira CABSAT, que
se celebra en Dubai entre o 12 e o 14 de marzo, contará con presenza
galega. Máis
polo miúdo a da empresa galega Televés, participante unha vez
máis neste prestixioso encontro internacional que serve, entre
outras cousas, de ponte tecnolóxica entre Occidente, Oriente Medio,
África e Asia por enteiro. Nesta cita, a compañía amosará o radio
de alcance do seu potencial de desenvolvemento e innovación, que
“non se limita ao seu ámbito de actuación máis tradicional, a
radiodifusión e distribución de sinais de radio-televisión, senón
que se estende tamén a outros nichos de mercado con amplo
percorrido, como IPTV, ou tecnoloxías dixitais aplicadas á
seguridade e os servizos sanitarios (Hospital Dixital)”,
informa a compañía con sede en Santiago.
Polo
tanto, haberá marxe na feira CABSAT para presentar a nova xeración
de medidores de campo H60 LTE Ready e con control remoto do sinal, a
máis recente evolución do primeiro equipo portátil que incorporou
o procesado dixital. Televés amosará en detalle, tamén, os máis
recentes resultados de Coaxdata, o equipo desenvolvido para ofrecer
conexión de alta velocidade empregando cableado xa existente nos
edificios. “En CABSAT”, informa Televés, “poderase
comprobar a eficacia desta solución que agora ofrece unha capacidade
de até 1Gb e 1.012 puntos de acceso sobre redes coaxiais”.