Televés amosa a súa aposta pola televisión híbrida na xornada anual do sector da TV interactiva
luns, 11 de novembro do 2013
A firma galega Televés
estará este martes 12 nunha cita en certa medida decisiva, a nivel
empresarial, para o futuro a curto e medio prazo da relación entre
os espectadores e os contidos de televisión e Internet. Falamos da
Xornada
Anual da Asociación Española de Televisión Interactiva
(AEDETI), na que vai avaliar en profundidade a chegada e espallamento
da televisión híbrida (estándar HbbTV), e tamén a resposta a esta
tecnoloxía de fabricantes, desenvolvedores e radiodifusores.
Neste foro, que se
celebrará en Madrid, a compañía galega estará representada polo
seu director comercial, Francisco Pérez, quen participará no panel
titulado Os novos televisores para a televisión híbrida.
Pérez abordará cuestións como a convivencia entre a TDT híbrida e
a SmartTV, e a necesidade de mellorar o coñecemento da televisión
híbrida entre a poboación. Ademais, presentará o receptor ZAS HBB
de Televés, que ten o potencial para converter os televisores
convencionais en dispositivos híbridos, “combinando a tradicional
oferta de TDT con todo a contido de Internet que as cadeas poñen a
disposición do usuario”. A firma galega tamén fará fincapé nas
vantaxes de uso deste receptor dende o punto de vista da súa
relación co espectador, xa que salienta por ser moi intuitivo e
doado de manexar a través do mando a distancia.
Con motivo da
participación neste foro e das razóns para participar nel (a
chegada da televisión híbrida, na que todo apunta a que Televés
vai ter moito que achegar), a firma galega cualificou xa de
“extraordinariamente positivo que os grandes operadores de
televisión se sumen á tecnoloxía da televisión híbrida, como é
o caso de RTVE, que recentemente puxo en marcha o seu servizo Botón
Vermello, que dá acceso a 90.000 horas de programación a elección
do usuario”.