Televés achegará a súa solución de marcado de auga dixital á estadounidense Dish Network
mércores, 21 de maio do 2014
A firma galega Televés,
con sede principal en Santiago e presenza en múltiples mercados, vén
de obter o visto e prace de Dish
Network, operador de televisión de satélite de Estados Unidos
que conta con 14 millóns de subscritores, para implantar a solución
de marcado de auga dixital (watermarking) da compañía
compostelá. Unha solución, por certo, aplicada na suite de
codificadores Clear QAM de Televés.
Segundo nos lembra esta
empresa, o proceso de marcado diríxese a introducir información
dixital oculta que certifica a autenticidade ou integridade do sinal,
fornecendo a identidade dos seus propietarios. No caso dos
codificadores Clear QAM, a marca de auga invisíbel é tamén “unha
opción para a análise forense de vídeo, nun esforzo para previr a
pirataría”.
O watermarking
dixital, recorda a firma santiaguesa, é polo tanto unha marca
embebida nos datos da imaxe que adoita empregarse para identificar a
propiedade e o copyright dese sinal. “Do mesmo xeito que a marca de
auga tradicional”, engade Televés, “a dixital é imperceptíbel
a primeira ollada e para detectala utilízanse técnicas como o
emprego dun algoritmo”. Trátase dunha ferramenta de protección
pasiva, que achega datos pero en ningún caso degrada ou restrinxe o
acceso ao sinal.
No caso dos codificadores
de Televés, a técnica emprégase para incluír na imaxe o número
de serie do receptor de Dish Network. Este número é invisíbel para
o ollo humano pero queda recolleito como marca de auga dixital se esa
imaxe é gravada ou retransmitida. “Deste xeito”, explica
Televés, “no caso de que o sinal se publique sen autorización,
pódese establecer o seguimento até o receptor infractor”.
Dish Network é un
provedor estadounidense de contidos que ofrece a clientes
residenciais e comerciais servizos de televisión por satélite,
Internet por satélite, programas de audio e servizos de televisión
interactiva. Segundo datos de novembro de 2013, ten 14 millóns de
subscritores e emprega a aproximadamente 34.000 traballadores, dos
que 25.000 están en Estados Unidos. A sede da compañía está en
Meridian, cidade do estado de Colorado.