Telefónica pon en marcha Eleven Paths, empresa de seguridade dirixida por Chema Alonso
venres, 7 de xuño do 2013
Telefónica Dixital fixo
pública este venres a posta en marcha dunha nova compañía de
seguridade de seu, centrada no eido en liña, un eido, sinala a
operadora, cada vez máis comprometido para as empresas e os
usuarios. A nova firma, de nome Eleven
Paths (Once Roteiros), estará dirixida por Chema Alonso,
antigo conselleiro delegado de Informática 64 e un dos principais
representantes, a nivel mundial, do sector da protección dos datos.
De feito, o seu equipo é responsábel do desenvolvemento de
coñecidas ferramentas de seguridade como FOCA ou MetaShield
Protector.
A empresa que vai dirixir
Alonso, engade Telefónica, nace baixo un concepto de laboratorio de
innovación, “coa intención de cambiar radicalmente o proceso
de desenvolvemento de produtos e servizos na área de seguridade”.
Eleven
Paths, máis polo miúdo, estará constituída por un equipo
de enxeñeiros e expertos en seguridade procedentes de Informática
64, xermolo como dixemos da nova empresa, e de expertos na área de
Telefónica. “Nace”, engade a operadora, “baixo un
modelo de xestión independente dentro de Telefónica Dixital que lle
imprimirá o carácter dinámico e flexible propio das start-ups, o
que vai permitir o desenvolvemento dinámico de solucións
innovadoras especialmente na área da ciberseguridade”.