Telefónica informa dun reforzo das infraestruturas de comunicación en Santiago e contorna
venres, 26 de xullo do 2013
A operadora Telefónica
quixo pór o seu gran de area axudando nas tarefas de atención aos
afectados e ás súas familias da traxedia de Angrois. E fíxoo,
informa, mantendo dende o día 24 pola noite un gabinete de crise
para coordinar tódolos traballos de reforzo de infraestruturas de
comunicacións en Santiago e, de xeito específico, na área do
sinistro e máis “en puntos críticos da capital galega”.
A maiores, e segundo nos contan fontes da operadora,“desde
primeira hora do día 25 de xullo están a operar en
Compostela dúas unidades móbiles especiais desprazadas desde
León e destinadas a reforzar a cobertura en hospitais
e no edificio Cersia, onde se instalaron 24 liñas fixas para que
poidan ser utilizadas polos equipos e os familiares alí
desprazados”. O interior do edificio e a súa contorna tamén
foron dotados con cobertura Wi-Fi aberta.
Por outra banda, os
devanditos traballos acompañáronse dunha identificación de tódalas
estacións base de Santiago que dan cobertura aos puntos que segundo
Telefónica foron os máis críticos: contorna do accidente,
hospitais, tanatorio, Xunta, Policía Local. Todas estas estacións
base configuráronse para operar en formato de emerxencias, comentan
fontes da operadora, para dar prioridade ao servizo de voz. Asemade,
a empresa conta que monotorizou e reforzou os números de atención
aos familiares, 112, 061, SERGAS, Xunta de Galicia, “e dende a
dirección de Telefónica en Galicia existe unha coordinación
permanente coa Axencia Galega de Emerxencias”, engade.