Telefónica e Mapfre desenvolven un servizo de teleasistencia para persoas maiores
martes, 5 de maio do 2009
A telefonía móbil e Internet son dous
servizos que, a día de hoxe, se fixeron practicamente indispensables para a
sociedade na que nos tocou vivir e moitas veces ocupan tanto tempo do noso
lecer que optamos por desconectalos para, dalgunha maneira, estar “conectados” coa vida real.
O segredo, como en todo, reside en
aproveitar as vantaxes que ofrecen ambas ferramentas ao máximo e tratar de
evitar o seu uso indiscriminadamente.
Un bo exemplo para comprobar as infinitas
vantaxes que obtemos mediante o uso responsable do móbil e de Internet vén de
ser presentado por Telefónica e Mapfre
Vitae, que desenvolveron un servizo
de teleasistencia móbil para persoas maiores que lles permite ás familias
coñecer en todo momento “como e onde se
atopan” os seus anciáns ou aquelas persoas que non queiran perder de vista.
O novo servizo permite prestar asistencia
aos maiores dentro e fóra dos domicilios a través de telefonía móbil e de
Internet mediante unha sinxela ferramenta de comunicación e seguimento baseada
nun sistema de localización AGPS (Assisted GPS) de terminais móbiles.
Para este proxecto, Telefónica
desenvolveu unha web a través da cal as familias poden localizar a ubicación
concreta da persoa maior gracias ao sistema de localización do seu teléfono
móbil.
Asemade, a ferramenta permite enviarlle
recordatorios ao seu terminal ou xestionar, modificar e incluir novos datos no
mesmo cando sexa preciso.
Mapfre Quavitae, pola súa banda, aporta
unha central telefónica que está operativa as 24 horas do día para realizar o
seguimento das persoas maiores, resolver emerxencias médicas e psicolóxicas e
intervir ante calquera alarma, entre outras cousas.
O proxecto piloto púxose en marcha en
Madrid, e terá unha duración de catro meses; asemade, conta con 200
participantes, os cales, xa están a recibir formación e os equipos de telefonía
necesarios.