Telefónica Open Future terá centro de emprendemento TIC en Helsinqui
venres, 18 de decembro do 2015
Telefónica
Open Future, a iniciativa global de crowdworking
tecnolóxico da operadora na que se insire Galicia Open Future
(Cidade da Cultura, Santiago), vai ter sede seu en Helsinqui: un
centro acelerador de empresas semellante en certos aspectos ao que
temos no monte Gaiás compostelán pero operando dende a área
metropolitana da capital de Finlandia. Así o vén de dar a coñecer
hoxe Telefónica, tras asinar un acordo co Ministerio de Emprego do
país escandinavo, máis polo miúdo co as entidades Team Finland,
Invest in Finland e Tekes (a Axencia Finlandesa de financiamento para
a innovación).
Na palestra empresarial
prevista para a capital as novas iniciativas tecnolóxicas finesas
recibirían, en palabras da operadora, “apoio en asesoramento e en
oportunidades de financiamento para dar forma ao seu negocio a escala
global”. Asemade, o centro servirá de punto de apoio para os
emprendedores españois que queiran introducirse no mercado finés,
“perfeccionando o seu produto e ampliando a súa carteira de
clientes”.
O obxectivo de Team
Finland é “acelerar a internacionalización da actividade de novas
empresas no sector da información, as comunicacións e a tecnoloxía,
e axudalas na procura de mercados nos que medrar”. A colaboración
con Telefónica Open Future ofrece “unha excelente oportunidade
para que as compañías finlandesas accedan a novas oportunidades de
negocio internacional”, sinalou Severi Keinälä, conselleiro
industrial do Ministerio de Emprego e Economía.
Para Telefónica, “esta
alianza espalla a presenza internacional da aceleradora máis aló de
China e Corea do Sur, onde xa estamos presentes, sendo a colaboración
con Finlandia unha forma natural de ampliar a actividade en Europa e
atraer start-ups de tecnoloxía avanzada que teñen interese
en traballar noutros mercados, como son España, Colombia, México,
Arxentina e Brasil, así como posibilitar que os emprendedores
españois tamén teñan a oportunidade de presentar e culminar os
seus proxectos nos mercados nórdicos”, informou Ana Segurado,
directora de Telefónica Open Future.
Nunha primeira fase
seleccionaranse 20 compañías cuxa convocatoria se renovará
anualmente. O panorama actual de Finlandia, para que non o saiba, é
de puxanza TIC e, polo tanto, de grandes oportunidades. Segundo conta
de primeira man Marko Vänskä, responsábel de Industria e Capital
para o Crecemento de Finpro, “o país conta con empresas
vangardistas en solucións tecnolóxicas intensivas en coñecemento
e, ademais, está a aumentar de continuo a súa reputación e
atractivo a través da posta en marcha de eventos e concentracións
onde amosar a súa tecnoloxía, como aconteceu recentemente con
Slush, un dos maiores eventos de emprendemento do Norte de Europa”.