Tecnópole lánzase á procura de empresas galegas que queiran practicar a innovación aberta
martes, 5 de febreiro do 2013
Como advertimos
hai unhas semanas, había moitas posibilidades de que a Tecnópole
lle dese continuidade ao seu proxecto 5
Sentidos para Innovar, un programa cuxa posta en marcha
serviu para conmemorar as dúas décadas de vida do complexo
empresarial de San Cibrao das Viñas (Ourense) e, tamén, para
formalizar o afianzamento dunha nova fórmula de cooperación aberta
para sermos máis competitivos. Unha fórmula que non se basea en
complexos postulados matemáticos e de probabilidades senón en algo
tan sinxelo como os cinco sentidos de cada quen interactuando cos das
persoas que ten ao seu arredor. Esta metodoloxía de intercambio
aberto de experiencias e coñecemento, que nun principio abrangueu a
90 empresas e centros de coñecemento da Tecnópole, esténdese
agora, tralo éxito colleitado, a entidades de toda a nosa xeografía.
A dinámica do
proxecto-evento, informan fontes do parque ourensán, toma como
argumento de partida que é preciso agudizar os cinco sentidos para
innovar de forma colaborativa, o que á súa vez dá lugar a un sexto
sentido orientado especificamente á innovación. Para acadar
isto e para asegurar a máxima participación das entidades de todo o
noso país, “habilitarase unha sala polivalente con recursos
novidosos e distribuído en cinco espazos, cada un deles ambientado
de xeito particular para estimular cada un dos sentidos
e fomentar o coñecemento mutuo entre as empresas participantes co
obxectivo de identificar alianzas baseadas na innovación”.
Os
participantes poderán escoitar a experiencia de empresas de
diferentes sectores no ámbito da innovación aberta, “que
implica que os procesos de innovación saian dos departamentos de I+D
das empresas para dar lugar a dinámicas baseadas na colaboración”.
Esta fórmula, engade a
Tecnópole, estase a
promover como “unha
solución en tempos de crise, xa que permite compartir os custos da
innovación entre empresas sen quitar que os resultados lles permitan
competir entre elas”.
Nesta liña, profesionais
de compañías
como Google, R e
Galicia Mar Renovables amosarán
as súas experiencias e animarán aos asistentes “a
pensar diferente para innovar e ser máis competitivos”.
A eles sumaranse representantes de sete empresas da Tecnópole, que
explicarán cales son as fortalezas das súas organizacións en
termos de innovación e o que os diferencia para ser máis
competitivos. A inscrición ao evento é gratuíta e pode
formalizarse xa na páxina web 5sentidosparainnovar.com