SmartPEME pecha curso con catro novos obradoiros tecnolóxicos
luns, 10 de xullo do 2023
O
programa
SmartPEME de asesoramento tecnolóxico para pemes e persoas autónomas
da Deputación de Pontevedra pecha esta semana o curso 2022/2023
e faino con catro novas accións formativas. Estas actividades,
impartidas de xeito telemático, centraranse en ciberseguridade nos
dispositivos móbiles, na creación dun plan de mercadotecnia
dixital, no uso de LinkedIn de maneira empresarial e na fabricación
dixital a través de Onshape. Os cursos e actividades formativas de
SmartPEME retomaranse en setembro.
O
luns 10 ás 10 horas celebrarase o primeiro dos obradoiros, titulado
Ciberseguridade, dispositivos móbiles. Manuel Freire, experto
universitario en Robótica, Programación e Impresión 3D, será o
encargado de poñer en valor a importancia de protexer os
dispositivos móbiles dada a relevancia que cobran na xestión dos
negocios.
O
martes 11 ás 11 horas dará comezo o taller de Fabricación
dixital. Debuxo con Onshape VIII – Proxecto final II. Esta
actividade enmárcase nun itinerario formativo que remata nesta mesma
xornada cunha parte teórica online e unha parte presencial
con prácticas no Fab Lab do Centro Provincial de Economía Dixital
no Viveiro de Empresas de Barro. Aquelas persoas que estiveron a
participar no programa recibiron formación teórica en debuxo 3D con
Onshape (16h), impresoras 3D de filamento (8h), impresoras 3D de
resina e escáner 3D (2h), así como prácticas centradas no uso de
impresoras 3D filamento (8 h), impresoras 3D resina (8 h) e escaneo
3D (4 h). Manuel Freire será novamente o docente encargado de
impartir a formación.
O
mércores 12, ás 12.00 h, desenvolverase unha acción formativa
telemática centrada en Como usar LinkedIn para empresas e
profesionais. Nela aprenderase a crear un perfil profesional e
unha páxina de empresa optimizada, así como a potenciar unha marca
na rede profesional, dende a introdución ata a promoción de
produtos ou servizos. Este taller será impartido por María Aller,
licenciada en Publicidade e Relacións Públicas e postgraduada en
Comunicación Corporativa.
O
xoves 13, Adrián Fernández, licenciado en Comunicación
Audiovisual, conducirá o taller O teu plan de márketing dixital,
paso a paso”, onde explicará ás persoas asistentes en que
consiste un plan de mercadotecnia a través das novas ferramentas de
comunicación, os seus beneficios e como crealo paso a paso para
evitar o fracaso dunha campaña dixital.