SmartPEME estrea sede en Vigo cunha gran showroom de emprendemento

A Deputación de Pontevedra abriu esta semana a actividade da súa nova sede en Vigo, e fíxoo na compaña dunha manchea de iniciativas empresariais innovadoras: 20 empresas asesoradas polo servizo da institución SmartPEME, a rede de formación e adestramento tecnolóxico-dixital, que terá, por certo, presenza de seu nas novas dependencias emprazadas en Eduardo Chao, en pleno casco vello vigués. A apertura da actividade, na que participou a presidenta da Deputación, Carmela Silva, tivo feitura de showroom: escaparate mundial de potencial emprendedor.
Acompañada polas asesoras e asesores de SmartPEME de todas as oficinas da provincia (Porriño, Cambados, Pontevedra, Lalín, Ponteareas, Vigo, A Estrada e Barro), a presidenta afirmou que “queríamos que o primeiro acto desta nova sede da Deputación en Vigo estivese ligado á economía, ás emprendedoras e emprendedores”. Silva enxalzou que “na nosa provincia hai moitas ideas innovadoras que responden ás novas demandas da sociedade e que o fan cunha mirada sustentábel, tan importante para o noso planeta”.
Na cita, na que participou tamén o alumnado de FP dos centros San Miguel e Daniel Castelao, presentáronse, entre outras iniciativas do ámbito da creatividade e a susstentabilidade, os seguintes proxectos tocados polo tecnolóxico: Dragonfly, drons para proxectos audiovisuais; Sabor&Mesa, blog e obradoiros de cociña; Miseguroonline, aseguradora en liña; e Niri Rodríguez, fotografía. Todos estes proxectos e os restantes quince que participaron na estrea da sede nova da Deputación recibiron o asesoramento das técnicas e os técnicos de SmartPEME, o proxecto da Deputación que ofrece asesoramento tecnolóxico desde o ano 2016 para mellorar a competitividade das PEME e das persoas autónomas e emprendedoras.
A respecto da nova andaina de SmartPEME, a presidenta dixo que “o obxectivo é que as TIC sexan un instrumento para que as ideas sexan realidades e os proxectos negocios rendíbeis, permitindo o seu mantemento e a creación de emprego". Carmela Silva destacou que a oficina de SmartPEME en Vigo, que a partir de agora estará situada no primeiro andar da súa nova sede en Eduardo Chao, atendeu 1.000 consultas e ofreceulles asesoramento a máis de 200 empresas desde o ano 2016. Tamén se organizaron 234 obradoiros, nos que participaron arredor de 2.000 persoas.