Situm revoluciona a xestión das empresas de seguridade coa súa solución MRM
luns, 16 de decembro do 2019
A
empresa galega Situm, responsábel do
innovador sistema do mesmo nome para a localización e navegación en
espazos interiores, segue a dar pasos de xigante en tecnoloxías que
nos permitan coñecer até o máis mínimo detalle a disposición dos
elementos dun edificio e o seu emprazamento exacto, poñendo o foco,
por suposto, na protección das persoas que están no interior dese
edificio. Froito
deste traballo son as tecnoloxías de xeolocalización en espazos
interiores de Situm MRM, que, en palabras da empresa compostelá,
melloran a dinámica das empresas de seguridade, para as que o
control destes espazos é a base do seu traballo.
A
solución Situm MRM, desenvolvida ao abeiro do amplo coñecemento que
ten a empresa galega respecto do día a día do sector security,
é unha contribución directamente encamiñada a axilizar o labor das
ditas ditas firmas e simplificar as súas tarefas, axudándoas a
superar as moitas dificultades de xestión que se lles presentan.
“Esta tecnoloxía”, explican dende Situm, “é froito de moitos
anos de traballo en materia de xeolocalización e da experiencia
xerada ao longo deste tempo coas empresas de seguridade que
depositaron a súa confianza en Situm, o que permitiu entender os
desafíos concretos aos que se enfrontan e ofrecer unha tecnoloxía
robusta e adaptada ás súas necesidades específicas”.
Entre
os retos principais figuraba a consecución dun sistema fiábel e
sinxelo dende o primeiro paso (Situm MRM facilita o traballo de
seguridade desde o momento inicial, non requirindo instalación
algunha, xa que a súa xeolocalización baséase en smartphones
polo que o investimento inicial en hardware e mantemento é mínimo).
A empresa galega engade que se trata dunha solución que non implica
unha formación previa do persoal e que o centro de control require
só unha pantalla desde a que se controla a situación detallada da
zona protexida, mentres o persoal despregado en campo utiliza unha
aplicación “doada de entender e manexar”. Situm salienta tamén
o carácter intuitivo da ferramenta, “xa que os empregados están
familiarizados co uso doutros sistemas GPS na súa vida cotiá”.
Amais,
a xeolocalización baséase en diversas fontes de información: os
sinais emitidos por distintos sensores xa dispoñibles no edificio
(Wi-Fi e Bluetooth) e os sensores de movemento que incorporan os
propios smartphones (acelerómetro, xiróscopo ou compás).
Doutra banda, o sistema tamén é moi destacábel porque fica
operativo aínda que non haxa cobertura, por exemplo durante as
quendas de vixilancia en estacionamentos ou sotos. Todos os datos
desta actividade son almacenados e, no momento en que se recupere o
sinal, a tecnoloxía permite obter un informe detallado dos labores
realizados nesa contorna.
Por
outra banda, a solución permite a identificación e a monitoraxe do
persoal de seguridade cunha precisión de poucos metros e achega unha
rápida e efectiva resposta en caso de emerxencia (nunha soa pantalla
é posíbel ter un control total da área vixiada o que minimiza
drasticamente o tempo de resposta e a redistribución dos efectivos).
“Situm
MRM”, explica a empresa, “non é só un sistema de localización,
senón que é unha plataforma intelixente de xeolocalización que
leva a cabo un rexistro diario de todas as actividades”. Así, a
partir dos datos recolleitos, elabóranse estatísticas e informes
onde fica rexistrado todo o labor diario, os percorridos realizados,
as incidencias ao longo da xornada, os tempos de resposta ou mapas de
calor. “Esta información”, engade a firma de Santiago, “facilita
unha análise posterior que permite reaxustar as pautas de
seguridade, se se cre necesario, e eliminar posíbeis perdas de
efectividade”.