Sila Games, Premio Novo Empresario de AJE-Vigo
venres, 11 de decembro do 2015
Sila
Games, plataforma galega de distribución de xogos en liña, vén
de obter o Premio Novo Empresario que concede a
asociación AJE-Vigo, que onte mesmo tamén entregou outro
galardón a Quesería
Marqués de Valladares, máis polo miúdo o Premio Mozo
Emprendedor. Sila Games, con sede en Vigo, é unha plataforma
comercial con clientes en Estados Unidos, Canadá, Alemaña, Corea do
Sur, Taiwán ou Australia. De feito, lembra AJE-Vigo, o 98% das súas
vendas sitúanse fóra do mercado estatal.
Ademais, engade a
asociación, Sila Games foi que de superar xa, por volume de
usuarios, á meirande empresa de distribución de xogos dixitais en
España e compite na actualidade con empresas do panorama
internacional. Sila Games dispón dun catálogo de máis de 1.800
xogos para PC dalgúns dos maiores desenvolvedores do panorama
internacional. A empresa foi posta en marcha por Francisco Javier
Mosquera, que recolleu onte o devandito premio de mans do conselleiro
de Economía e Industria, Francisco Conde.
Na categoría de Mozo
Emprendedor, Quesería Marqués de Valladares obtivo a mellor
puntuación do xurado de todas as candidaturas presentadas. Trátase
dunha tenda de venda de queixos artesáns estatais e internacionais
que, en palabras de AJE Vigo, foi quen de “recrear as condicións
dunha cava de maduración natural cunha temperatura constante de
12-14º e cun 80% de humidade, para que os queixos estean no seu
punto óptimo de consumo”. Alejandro Montes Rodríguez, o promotor
desta iniciativa, recolleu o galardóns de mans de José Manuel
Nogueira, coordinador de Negocio de Abanca.
Por certo que dentro da
categoría Mellor Empresario repartíronse tres accésits. O de
Calidade foi para Beta, empresa de Pontevedra que deseña, desenvolve
e fabrica implantes para o sector veterinario, sobre todo para
traumatoloxía, ortopedia e neurociruxía veterinaria. O accésit de
Innovación foi para Micaton, proxecto con sede en Vigo que se adica
á creación de novos produtos aplicando I+D+i e enfocando as súas
innovacións á bricolaxe e sector industrial. O terceiro accésit, o
de Responsabilidade Social Empresarial foi outorgado a Vigo Entrena,
programa de adestramento deportivo personalizado para grupos
reducidos.