Sete de cada dez fogares galegos teñen Internet de banda larga
luns, 18 de maio do 2015
Os últimos datos do
Instituto Nacional de Estatística (INE) amosan unha porcentaxe de
poboación galega con conexión a Internet de banda larga que se
achega ao 70%. Ou sexa, que sete de cada dez fogares teñen o
devandito servizo contratado, o que supón un incremento do 50% con
respecto ao período 2010-2014. Así
o reflectía a semana pasada a Axencia para a Modernización
Tecnolóxica Galega (AMTEGA), que engadía que as anteriores
cifras sitúan á nosa terra a catro puntos da media estatal.
No informe tamén se
fan saber datos relevantes sobre o tipo de conexión e como foron
mudando os nosos hábitos para accedermos á Sociedade do Coñecemento
ao longo do último lustro. Así, a día de hoxe, un 82,9% accede a
través de dispositivos móbiles, “1,2 puntos máis cá media
estatal”, explica a axencia, que engade que a conexión a Internet
a través de rede por cable ou fibra óptica sitúase nun 26,8%, 5,9
puntos máis que a media estatal (20,9%).
No que atinxe ao tamaño
do hábitat, o organismo que dirixe Mar Pereira sinala que nos
concellos con poboación de 20.000 a 50.000 habitantes, a media
galega supera á estatal nos tres indicadores principais (vivendas
con ordenador, con acceso a Internet e con banda larga). Así, a taxa
de vivendas con ordenador acada case o 80%.
No
informe A mocidade e as TIC do O Observatorio da
Sociedade da Información e a Modernización de Galicia (OSIMGA)
constátase tamén que a convivencia con nenos “inflúe
positivamente” na contratación e uso de internet. Deste xeito,
indícase, o 83,2% dos fogares galegos con rapaces de 3 a 16 anos
dispón de servizo de Internet de banda larga, fronte ao 59,8% dos
domicilios sen nenos. Segundo apunta AMTEGA, unha das conclusións
máis salientábeis do estudo do INE é que por vez primeira Galicia
supera a media estatal no uso de ordenador e de Internet no grupo de
idade de 16 a 44 anos, que acada o 91%.
Polo que atinxe aos
usos dos servizos de Internet, o 87,3% dos internautas galegos le ou
descarga xornais ou revistas en liña, case 10 puntos porcentuais por
riba da media estatal. Un 65,3% dos usuarios de Internet da nosa
terra participa en redes sociais. Tamén é digno de mención o
incremento no uso de servizos como a solicitude da cita médica a
través da páxina web (case 14 puntos máis cá media estatal).