Segundo unha tese, cómpre regular o uso das TIC no traballo
venres, 8 de xullo do 2011
Na actualidade, ao igual que non existen empresas que poidan prescindir do teléfono (ben sexa fixo ou móbil), cada vez son menos as que poidan desligar a súa actividade de Internet e os seus servizos, sobre todo o correo electrónico, que é unha ferramenta que axiliza moitos trámites e aforra moitos cartos e tempo.
O problema é que, segundo a tese de doutoramento dun profesor da Universidade de Vigo, “o acceso a esta tecnoloxía para outros usos distintos aos puramente laborais dá lugar a numerosos conflitos entre as empresas e os seus traballadores” que moitas veces non atopan un termo medio que satisfaga ás dúas partes, é dicir: ou os traballadores abusan do seu dereito a usar Internet para chatear ou meterse en redes sociais (cando non páxinas con contidos pornográficos), ou os xefes cortan o servizo radicalmente e non lles permiten máis que usar a intranet da entidade, privando aos empregados de xestionar o seu correo particular para outras cuestións cotiás non menos importantes que as do traballo.
Alexandre Pazos, autor da tese de doutoramento sobre o dereito á liberdade de expresión e o dereito á liberdade de información no ámbito laboral, explica no DUVI que no noso país “hai un importante baleiro legal neste senso, que podería solucionarse cunha regulación específica sobre o uso do correo electrónico e as redes sociais no traballo, adaptada ás novas realidades sociais actuais”.
Xa que logo, dende o seu punto de vista, é necesario que se adapte a normativa sobre o uso das novas tecnoloxías da información na empresa “mediante convenios colectivos, ou mesmo con manuais ou códigos de conduta internos en cada empresa que establezan as pautas a seguir no que ao manexo destas ferramentas se refire”, afirma.
A fin de contas non hai máis que ter sentido común e aplicalo tanto no uso de Internet como da telefonía ou calquera outro servizo que a empresa pon a nosa disposición. Da mesma maneira que por ter teléfono un traballador non pode pasar as súas horas de traballo falando cos amigos ou en liñas de contactos, é de entender que tampouco pode usar o ordenador para pasar o tempo ociosamente, algo que non todos acaban de asimilar e que por iso da pé a que se fagan teses como a de Pazos, que por certo, obtivo un Sobresaliente Cum Laude polo seu traballo.