Seguen a medrar as reclamacións favorables aos usuarios no eido das telecomunicacións

Unha de dúas: ou as entidades públicas dedicadas a amañar conflitos entre clientes e empresas de telefonía e redes están a facer cada vez mellor o seu traballo, ou ben os trucos das compañías provedoras destes servizos están cada vez máis coma cartas ao descuberto. O caso é que segundo informa a Oficina de Atención ao Usuario de Telecomunicacións nos seus recontos sobre a actividade desenvolvida o ano pasado, o número de usuarios que coa axuda deste departamento acadou unha resolución do seu problema vai cara a arriba. Máis polo miúdo, e polo que se ofrece nos seus informes, o número de reclamacións rematadas (na súa meirande parte a favor dos usuarios de a pé) chegou ao longo de 2008 ás 24.037, o que significa unha porcentaxe de incremento con respecto ao ano anterior de case un 25%. Concretamente, durante o ano que vén de rematar as queixas resoltas pola Oficina que ao final foron favorables para o cidadán representaron un 85% do total, ficando o 15% restante do lado das operadoras.
Asemade, engade a entidade, constatouse un medre no que se refire ao coñecemento que a cidadanía ten dos seus dereitos e, máis especificamente, do que ofrecen departamentos coma a Oficina. Máis en detalle, esta contestou en 2008 un total de 234.780 consultas de usuarios de servizos de telecomunicacións, o que representa un medre do 62% en referencia ao acontecido o ano previo. Asemade, a Oficina recibiu 24.679 reclamacións, un aumento do 24% en relación coas cifras de 2007.
No que se refire á natureza mesma das consultas e reclamacións, dicir que as máis salientables dende o punto de vista cuantitativo foron as que atinxen aos servizos de voz e datos e non tanto as vinculadas ao acceso ás redes. Signifique isto o que signifique (se cadra as cifras veñen dadas por un medre na contratación de paquetes de voz e datos, simplemente), o caso é que as consultas sobre paquetes pasaron do 11% ao 22% entre 2007 e 2008, diminuíndo pola súa parte as do acceso ás redes dun 30 a un 16%. As xa (por desgraza) clásicas queixas sobre procesos de alta e baixa (que nos obrigaban a procesos kafkianos de subministros de faxes que nunca se daban lido por parte dos responsables) semellan ir reducindo a súa presenza, a xuízo da Oficina debido ás medidas correctoras introducidas polo Ministerio de Industria co fin de axilizar a tramitación e facela máis favorable ao usuario de a pé.
Os datos achegados polo Goberno confirman tres datos importantes: que cada vez hai máis usuarios que contratan paquetes de “Internet+telefonía+TV”, que hai máis persoas descontentas co servizo e que cada día hai máis xente que se anima a “denunciar” o seu caso perante as autoridades responsables. Por outra banda, Industria informou de que baixaron as reclamacións relativas ao retraso na instalación da liña telefónica fixa; máis, iso sí, mantense a tendencia á alza das reclamacións e consultas sobre facturación. En canto a reclamacións por averías e interrupcións do servizo, en 2008 houbo unha diminución das producidas nos servizos de telefonía fixa e móbil e, pola contra, un incremento nas de acceso a Internet e paquetes de voz e datos. En telefonía móbil, descenden as reclamacións por averías, así como as relativas aos problemas de cobertura ou mensaxes SMS Premium. Por operadores, tanto en telefonía fixa como en paquetes de voz e atención ao cliente, Ya.com ten o maior nivel de reclamacións, mentres que en telefónia móbil é Yoigo. Pola contra, Telefónica sitúase en último lugar en reclamacións de telefonía fixa e paquetes de voz e datos, mentres que Vodafone ocupa a última posición en reclamacións en telefonía móbil e queixas sobre servizos de atención ao cliente.