Seareiros de Star Wars están a organizar na Web unha quedada en Compostela

Se a Rede serve para que xente de todo o mundo comparta experiencias arredor de afeccións común, benvida sexa. O mesmo podemos dicir se fai que vida dos seareiros de Star Wars sexa o máis levadeira posible, ou se actúa de intermediaria para que a capital de Galiza se converta por uns días no emprazamento narrativo da dita saga. Así nolo conta estes días El Correo, onde logo de pescudar o que acontecía nunha páxina web vinculada á dita entrega galáctica, descubriron que o sitio en liña oficiou de punto de encontro para unha quedada en Santiago, o 21 de maio e a xeito de conmemoración do trixésimo aniversario de O imperio contraataca, o segundo filme (cronoloxicamente falando) que se deu a coñecer da saga. A idea é facer de Compostela unha das capitais incluídas na conmemoración oficial, a nivel internacional, deste acontecemento, que terá o seu centro operativo de actividades na cidade de Orlando, en Estados Unidos.
O caso é que semella que Santiago ten apoios de abondo na dita comunidade en liña (que, por certo, inclúe versión en galego, o que é moi de agradecer), ben sexa pola palestra informativa que supón o Ano Xacobeo, ben sexa pola cantidade de seareiros de Star Wars que se arrexuntan na nosa terra. Así, dende a web Imperial Storm Troopers estase a levar a cabo un labor de mobilización para acadar a máxima presenza de afeccionados á saga na capital de Galicia, o que incluiría a presenza de todo tipo de caracterizacións baseadas nos personaxes das películas, principalmente (ou iso se conta dende a páxina) os adheridos ao lado escuro da forza. Entre outras cousas actividades a desenvolver, está programado un desfile das tropas imperiais polo casco vello, amais dunha revisión das tropas na praza da Quintana oficiada polo mesmísimo Darth Vader.