Santiago porá o foco na capacitación maker para impulsar a calidade de vida nos barrios
luns, 13 de marzo do 2023
O
Concello
de Santiago aprobou a apertura do procedemento de licitación dos
servizos asociados ao programa Colabora e innova no teu barrio
no marco da operación Faino Ti, que conta cun investimento de
210.892,18 euros, dividido en tres lotes. Porase o foco en fomentar a
presenza cidadá das ferramentas tecnolóxicas máis abertas á
participación.
Colabora
e innova no teu barrio contempla o desenvolvemento de dous
espazos e procesos interxeneracionais de achegamento da cultura maker
(tecnoloxías participativas, cidadás e creativas) aos titulares e
persoal das industrias e negocios tradicionais dos barrios de
Santiago; a transmisión interxeneracional de coñecementos TIC
(Tecnoloxías da Información e das Comunicacións) da poboación
mais nova á poboación maior, “de xeito que se que favoreza a
redución da fenda tecnolóxica”; e a divulgación deses
coñecementos e procesos de aplicación da cultura maker nos
negocios tradicionais entre a infancia e as familias
O
lote 1 conta cun orzamentos base de licitación de 108.016,07 euros e
contempla o deseño e desenvolvemento dun fab lab (fabricación
dun laboratorio) que achegue a cultura maker e as
posibilidades tecnolóxicas aos oficios e industrias tradicionais dos
barrios, e aos colectivos máis desfavorecidos. “Desde xeito, ao
finalizar a operación, operarios de oficios como modistas ou
zapateiros, deben ser capaces de coñecer tecnoloxías como a
Impresión 3D ou a Realidade Aumentada, e ser capaces de valorar a
aplicación (ou aplicar directamente) estas tecnoloxías aos seus
oficios, facendo posíbel a innovación en oficios tradicionais”,
informou o Concello.
Pola
súa banda, o lote 2, a difusión do fab lab e a Rede TIC 2,
conta cun orzamento base de licitación de 86.276,63 euros. E o lote
3, un catálogo de boas practicas en materia de usos das TIC e
talento STEM (que combina ciencia, tecnoloxías, enxeñaría e
matemáticas) relacionado con oficios tradicionais e industrias
asentadas no concello de Santiago, sae a concurso cun orzamento base
de licitación de 16.598,85 euros.
Entre
os obxectivos concretos de Colabora e innova no teu barrio
figuran os seguintes:
-Mellorar
a sensibilidade tecnocientífica da mocidade dos barrios e rural de
Compostela.
-Implantar
dinámicas de colaboración na realización de proxectos relacionados
co tecido socioeconómico do barrio.
-Achegar
equipamento e maquinaria necesaria para o desenvolvemento dos
proxectos tecnolóxicos á mocidade, favorecendo o coñecemento e
manexo deses aparellos e da súa tecnoloxía.
-Mellorar
o coñecemento e a valoración da cidadanía sobre o seu patrimonio
industrial e a capacidade de innovación do seu territorio
A
operación Faino Ti, incluída na Liña de Actuación 1 da
EDUSI REVIVE do Concello de Santiago de Compostela, e financiada nun
80% polo Programa Operativo de Crecemento Sustentábel FEDER
2014-2021; pretende difundir as competencias tecnolóxicas e as
habilidades de resolución de problemas asociadas ao desempeño dun
emprego entre as novas xeracións dos barrios máis desfavorecidos e,
ao mesmo tempo, achegar o potencial das innovacións tecnolóxicas a
poboación maior e os oficios tradicionais desenvolvidos nos barrios
de Santiago para dotar a estes barrios e comercios con posibilidades
de reformulación e consolidación económica.