SIVSA reforza o seu equipo de desenvolvemento de negocio
venres, 18 de marzo do 2016
SIVSA,
empresa galega referencial en solucións informáticas para a saúde
(responsábel entre outras cousas de Fenix,
o innovador software de xestión clínica na nube especialmente
pensando para médicos e centros médicos de pequenas dimensións),
ten novidades importantes en materia de fortalecemento profesional da
súa presenza. Falamos da incorporación de Jesús Álvarez ao seu
equipo de desenvolvemento de negocio, incorporación que SIVSA
cualifica de “forte aposta pola excelencia como compromiso e o
estilo profesional”.
Jesús Álvarez, sinala a
empresa, participará directamente na remodelación que a compañía
iniciou para impulsar o seu crecemento cualitativo.
Como lembraremos, SIVSA
estivo (e está) mergullada nun ambicioso proceso de medre
empresarial e de mercado, en ámbitos como os servizos cara á
Administración, as solucións de xestión de procesos
administrativos e telemáticos, os sistemas tecnolóxicos de axuda
para a toma de decisións en organismos públicos ou ben a
implantación de solucións avanzadas de mobilidade, na nube, de
transparencia ou de participación cidadá.
Estas e outras liñas de
actividade veranse reforzadas coa presenza de Jesús Álvarez, que
asume o cargo de director de Sector Público na empresa galega,
“fortalecendo a súa estrutura de dirección”. Segundo engade
SIVSA, na súa ampla experiencia profesional ostentou este mesmo
cargo noutras compañías de primeiro nivel, “polo que é gran
coñecedor do sector”.