Román Rodríguez e Julián Cerviño presentan as novas e revolucionarias aulas AMI
luns, 4 de setembro do 2023
O
conselleiro de Cultura e Educación, Román Rodríguez, e o director
da Axencia para a Modernización Tecnolóxica (AMTEGA), Julián
Cerviño, visitaron este luns 4 de setembro o Colexio CEIP
Plurilingüe Pintor Laxeiro, onde presentaron o novo concepto de
Aulas AMI (Aulas Móbiles de Informática), que, sinalaron, “supón
un paso máis na potenciación de metodoloxías de aprendizaxe
innovadoras para favorecer o desenvolvemento do alumnado e o labor do
profesorado cun mellor aproveitamento”. Será, dixeron, “un
modelo metodolóxico de aprendizaxe más colaborativo, creativo e
competencial”.
Para
materializalo contarase con dúas liñas de infraestruturas que son
froito da colaboración entre o departamento de Educación e a
AMTEGA. Por unha banda, as infraestruturas físicas, modernizadas de
xeito progresivo a través do Plan de Nova Arquitectura Pedagóxica,
cun investimento de 243M€ en marcha que “está posibilitando a
construción, ampliación e rehabilitación de centros escolares en
base a novos parámetros onde se prioriza o enfoque educativo destes
espazos”, explicaron.
A
segunda destas liñas son as infraestruturas tecnolóxicas, onde se
inxiren os Polos Creativos, xa estreados o pasado curso en 225
centros e que, segundo explicaron Rodríguez e Cerviño, “iranse
estendendo ao longo deste ano académico ao 100% dos centros cunha
achega de 27M€ para favorecer as capacidades STEM e artísticas dos
estudantes”. Aos polos súmanse as novas Aulas AMI presentadas este
luns 4 de setembro en Vigo. Trátase dun conxunto de ordenadores
portátiles, con carro de carga incorporado, que pode desprazarse a
calquera aula do centro para convertela nunha aula dixitalizada,
informaron.
“Agora
xa non é o alumno quen vai a esa aula con ordenadores, senón que
estes están á súa disposición, coa finalidade pedagóxica que
estableza a docencia concreta”, explicou o conselleiro de Cultura e
Educación, engadindo que cada Aula Móbil “terá suficientes
portátiles como para que o grupo máis numeroso do centro dispoña
dun por alumno en caso de ser necesario”. O investimento total é
de 7,5M€. O seu despregue en centros de Primaria, como o visitado
en Vigo, xa comezou e estenderase ao longo de 2024. Ao remate, terá
distribuídos 13.000 equipos en 649 centros.
Por
último, dentro deste proceso de modernización e dotación de
ferramentas didácticas ao servizo do ensino, o 100% das aulas de
Galicia van contar con paneis interactivos. Serán, en total, 14.026
cun investimento de preto de 50M€. Instalaranse nas aulas de
referencia de cada grupo: as que comparten para o groso das materias.
Este paneis chegarán, ademais, a 500 centros de ensinanzas como os
conservatorios ou as escolas de idiomas.
Ceviño
destacou que a nosa Comunidade “é hoxe unha sociedade dixitalmente
madura, cunha educación plenamente dixitalizada, polo que os
desafíos para o futuro implican camiñar na vangarda na aplicación
das tecnoloxías que se atopan fase de desenvolvemento”.
En
conxunto, os Polos Creativos, as Aulas Móbiles de Informática e a
dotación de paneis interactivos supoñen un investimento total de 84
millóns que buscan “desenvolvementos didácticos e das aplicacións
educativas ao servizo de alumnos e de profesores”, sinalou o
conselleiro.