Román Rodríguez augura o maior dos éxitos para Rapa, a primeira proposta do Hub Audiovisual
luns, 3 de xaneiro do 2022
Román
Rodríguez, conselleiro de Cultura e Educación e Universidade,
mantivo este 3 de xaneiro unha xuntanza co produtor executivo de
Portocabo, Alfonso Blanco, para valorar o resultado da rodaxe en
Galicia da serie Rapa, a nova produción da empresa galega e Movistar+ que é, ademais, a
primeira proposta realizada ao abeiro do fondo de atracción de
rodaxes do Hub Audiovisual da Xunta.
No
encontro, no que tamén participou o director da Axencia Galega das
Industrias Culturais (AGADIC), Jacobo Sutil, expuxéronse os detalles
da filmación levada a cabo durante dous meses en distintas
localizacións da serra da Capelada e de varios concellos desta zona
da provincia da Coruña.
Rapa
é como dixemos a primeira proposta realizada ao abeiro do novo Hub
Audiovisual da Industria Cultural da Xunta e, en concreto, do seu
fondo para a atracción de rodaxes, no marco do que resultou
adxudicataria dunha axuda de 300.000 euros. Con esta medida
específica do Hub, o Goberno galego ofrécelles “unha nova
inxección económica ás empresas galegas que leven a cabo proxectos
xunto con produtoras, canles de televisión e plataformas de fóra de
Galicia”. Un dos principais requisitos consiste na realización dun
investimento mínimo en Galicia: 1M€ para longas cinematográficas
de ficción e animación e 1,5 M€ para as series de ficción. No
caso de Rapa o gasto realizado a raíz da súa rodaxe durante
máis de dous meses na nosa Comunidade multiplica por 10 a contía da
subvención concedida, xa que este se estima superior aos 3M€.
Na
reunión Rodríguez e Sutil tamén tiveron ocasión de coñecer
detalles dos vindeiros proxectos de Portocabo, que é tamén
responsábel da serie Hierro, unha das series de meirande
éxito das achegadas nestes últimos anos polas produtoras do ámbito
europeo. Así, a empresa coruñesa prepara xa unha secuela do exitoso
filme Cuñados, que acaba de obter apoio da Xunta para a súa
posta en marcha a través das subvencións ao desenvolvemento
audiovisual.
Rodaxe
na Capelada
Rapa,
rodada en parte nos cumios e cantís da Capelada (Cedeira),
estrearase como dixemos en 2022. Con media ducia de episodios, vén
da man de Pepe Coira e Fran Araújo (creadores), e está dirixida por
Jorge Coira, contando con Javier Cámara e Mónica López como
protagonistas.
O pano de fondo é a tradicional Rapa das Bestas
de Cedeira, o primeiro domingo do mes de xuño no Curro da Capelada,
o único día do ano en que os cabalos que corren ceibos polas
alturas da serra deixan ser libres. No marco da celebración dunha
tradición que “sintetiza o belo e o salvaxe”, é asasinada
Amparo Seoane, alcaldesa da localidade. Resolver o crime é o
obxectivo común de Tomás, mestre local, e Maite, un sarxento da
garda civil. E converterase en algo máis: unha boa razón para
vivir.
A
rodaxe fíxose integramente en Galicia, nas localidades de Cedeira e
Ferrol.
Únense a Javier Cámara e Mónica López, os actores
Lucía Veiga, Eva Fernández, Toni Salgado, Ricardo Barreiro, Berta
Ojea, Jorge Bosch, Santi Prego, Paula Morado, Adrián Ríos, Iria
Sobrado, Tito Asorey, Mabel Rivera, Víctor Mosqueira, Nacho Castaño
e Lara Boedo.