Roberto Brenlla e GPUL amosan como facer actividade empresarial rendíbel con software libre
luns, 6 de abril do 2015
O Grupo de Programadores
e Usuarios de Linux (GPUL), con centro de operacións na Facultade de
Informática da Universidade da Coruña, anunciou
que ten preparada para este xoves 9 de abril unha charla sobre
modelos de negocio baseados en software libre. Ou sexa, un
faladoiro onde se expoñan (e se comenten entre todas e todos)
exemplos de metodoloxías para facer rendíbel no económico unha
iniciativa empresarial baseada en código aberto, e amosar tamén
casos concretos desta opción real de mercado. A cita é ás 17.00
horas no laboratorio 0.1w da Facultade de Informática da UDC. A
xornada desenvólvese baixo o epígrafe Modelos de negocio
colaborativos, porque o Software Libre domina no mercado?
Segundo
apuntan dende GPUL, a sesión enmárcase no seu obxectivo xeral de
visualizar como a programación aberta fornece “moreas de valores e
vantaxes fronte a alternativas privativas”. A xornada responde a
unha arela dos organizadores que xa vén de antigo: a arela de tirar
proveito do auxe do emprendemento TIC en Galicia para amosar aqueles
proxectos que se están a pór en marcha relacionados co software
libre, “deixando claro que existen alternativas aos modelos de
negocio tradicionais, respectando as liberdades do posíbel
cliente e mesmo axilizando o desenvolvemento e a expansión dunha
iniciativa empresarial baseada en open source”.
A cita
contará coa presenza de Roberto Brenlla, un dos meirandes expertos
da nosa terra e do ámbito estatal en materia de actividades
empresariais ligadas aos modelos de código aberto. Segundo nos
lembran dende GPUL, Roberto estudou económicas na Universidade de
Santiago de Compostela e foi un dos fundadores da empresa galega
Tegnix, adicada a consultoría baseada en software libre e a xestión
de sistemas en contornas empresariais, traballando tamén en
proxectos para a administración pública como
o proxecto Abalar da
Xunta de Galicia con máis de 75.000 equipos xestionados
de maneira remota.