Roberto Baratta expón as múltiples saídas profesionais do alumnado especializado en ciberseguridade
xoves, 11 de maio do 2017
- Íñigo Cuíñas, director da EE de Telecomunicación, Rubén Frieiro, socio de Riscos de Deloitte e Roberto Baratta, director de Prevención de Perdas de ABANCA
A
Escola
de Enxeñaría de Telecomunicación do Campus de Vigo acolleu onte un
encontro con o director de Prevención de Perdas, Continuidade de
Negocio e Seguridade de ABANCA, Roberto Baratta, que abordou no
relatorio Ciberseguridade, unha carreira profesional, as
diferentes e moi variadas xanelas profesionais que ofrece o ámbito
específico da protección TIC para o alumnado da dita Escola.
Asemade, tamén abordou as diferentes liñas profesionais
polas que poden optar as/os estudantes, cales son as habilidades e
perfís para cada caso e cal é a situación do mercado en xeral e en
Galicia en particular. En palabras de Baratta, non é certo que os
mercados galego e estatal estean aínda por desenvolver (en relación
a moitos dos países máis avanzados no eido da ciberseguridade),
máis ben o contrario: é un mercado maduro, “dos mellores do
mundo”, pero que ten unha aínda unha eiva importante: existe un
baleiro importante de profesionais cualificados e formados
especificamente.
A
conferencia de Baratta insírese no ciclo Líderes que inspiran
seguridade da Cátedra Deloitte de Ciberseguridade da
Universidade de Vigo, que ten a finalidade, segundo explicou o
director da Escola, Íñigo Cuiñas “de pór en valor a
ciberseguridade para que a xente teña en conta a importancia deste
ámbito, que non só afecta a persoas ligadas ao mundo das
telecomunicacións ou da informática, senón a calquera persoa que
manexe información dixital”.
Segundo
explicou Baratta facendo fincapé nos importantes camiños
profesionais que se abren ao abeiro da salvagarda dos datos, das
redes, dos servidores e das comunicacións, a ciberseguridade é “una
condición inherente ao modelo dixital e imprescindíbel para o
correcto funcionamento e desempeño da sociedade nel, e responde así
mesmo ao traslado e auxe da delincuencia nestes novos escenarios”.
En consecuencia, o regulamento en sectores como a administración, o
financeiro e as telecomunicacións “esixe altos niveis de
ciberseguridade para dar resposta a estes novos retos”.
Co
dito relatorio inaugurouse o ciclo Líderes que
inspiran seguridade da Cátedra Deloitte de Ciberseguridade, que
terá continuidade o vindeiro mes de setembro con novas conferencias,
nas que se abordarán diferentes temáticas relacionadas co ámbito
da protección e a salvagarda dos datos e das comunicacións.