Renault estrea o seu primeiro concesionario en liña... e en 3D

Os responsables de Renault, sabedores de que preto do 80 por cento dos posibles compradores “obteñen a súa primeira información sobre o vehículo que están a procurar en Internet antes de acudir ó concesionario para adquirilo”, veñen de presentar, na súa web francesa de Univers Renault, un formato de salón expositor en liña que permite ver os modelos totalmente en 3D como se o visitante estivera presenciándoos en persoa.
Este Universo Virtual desenvolvido por Renault permite visualizar tódolos modelos da firma de xeito cómodo e doado sen moverse do fogar e ofrece a posibilidade de manter contacto directo (de xeito virtual, iso si) con distintos axentes do concesionario que ofrecen información sobre financiamento e distintas facilidades de pago.
Agora ben, é imprescindible que, amais de contar cunha boa tarxeta gráfica para non perder detalle dos modelos, o internauta teña un bo dominio do francés, pois é a única lingua na que está dispoñible, polo de agora, este servizo.
Asemade, algúns dos vehículos ofertados pola firma do rombo poden rotarse en vistas de ata 360º e visualizar os seus detalles interiores a través de distintas fotografías fixas que, a falta de imaxes audiovisuais, son a mellor opción para evitar a insistencia dos comerciais ao tratar de “adxudicarnos” o coche “feito á nosa medida”.