Remata EficienTIC 2013, o programa de ciencia e tecnoloxía para os estudantes galegos

O 19 de febreiro daba comezo a segunda edición de EficienTIC, un encontro para estudantes de ESO e Bacharelato de colexios e institutos de secundaria de toda a xeografía galega encamiñado a difundir todo o relacionado coa eficiencia enerxética e a tecnoloxía. As ditas xornadas chegaban ao seu fin o pasado xoves día 14, sendo desenvolvidas todos os martes e xoves de febreiro e marzo. Cómpre dicir que detrás de EficienTIC se atopa CITEXVI (Cidade Tecnolóxica de Vigo), GRADIANT (Centro Tecnolóxico de Telecomunicacións de Galicia), ENERGYLAB (Centro Tecnolóxico de Eficiencia e Sostibilidade Enerxética), FECYT (Fundación Española para a Ciencia e a Tecnoloxía) e o Ministerio de Ciencia e Innovación.
EficienTIC 2013 levouse a cabo no edificio CITEXVI -situado no Campus Universitario de Vigo- e acolleu a un bo numero de visitantes. Máis polo miúdo, arredor de 800 estudantes de 17 centros educativos galegos participaron nas actividades propostas que incluían: demostracións e visitas guiadas, obradoiros para amosar como empregar a tecnoloxía que nos rodea e axudar deste xeito ao medio ambiente, aprender como as enerxías renovables poden alimentar as nosas máquinas ou mesmo facer funcionar aparatos sen electricidade.