Redelibros recompensará a fidelidade dos seus usuarios con libros de balde
luns, 14 de marzo do 2011
Redelibros, a
rede social galega do libro creada para reunir nun mesmo punto virtual a
seareiros da lectura cos mesmos gustos e afeccións, quere recompensar a
participación dos seus usuarios (que por cento xa suman máis de 700), cunha
peculiar iniciativa que lles permitirá mercar libros sen gastar un peso.
Este peculiar
comercio funciona da seguinte maneira: cada membro ten asociada ao seu perfil
unha conta persoal de redepuntos que
se vai incrementando a medida que o usuario ou usuaria interactúa en
Redelibros, é dicir, publica entradas no seu perfil, engade comentarios en
calquera das páxinas ou achega fichas de libros, textos ou artigos á rede
social; en definitiva, axuda á construcción da ferramenta a partir das súas
aportacións en forma de comentarios, publicacións ou contidos.
Estes redepuntos son indicadores da actividade
que realiza cada usuario na web e funcionan a modo de moeda interna para trocar
por libros cedidos de balde por editoriais como Xerais, Kalandraka, Faktoría K
ou NigraTrea para a Tenda de Redepuntos.
A medida que os
usuarios e usuarias colaboren coas súas aportacións, verán incrementados os
seus redepuntos, e canto máis comentarios e achegas realicen, máis puntos
recibirán nas súas contas particulares.
Para “mercar” os libros, as persoas usuarias
só terán que seleccionar aqueles que lles gustan da tenda virtual e premer no
botón Mercar agora. O sistema
descontará automáticamente os seus redepuntos e enviaralle unha mensaxe por
correo electrónico para que indique se quere recibilo por correo a portes
debidos ou ben pasar a recollelo persoalmente a calquera das librarías
colaboradoras (neste momento, Libraría
Cartabón e Mazinger en
Vigo e Libraría Paz e Cronopios en Pontevedra).
Cada usuario
poderá mercar tantos libros como desexe, sempre e cando teña suficientes
redepuntos.
Cabe lembrar que
esta ferramenta, creada no noso país a finais do pasado ano, permítelle aos seus usuarios entrar en
calquera das librarías asociadas e descargar obras para eReaders, teléfonos móbiles, tablets,
ordenadores ou iPhones, así como acceder a obras en formato impreso e
adquirilas para seren recibidas por correo postal.