Red Mundo Atlántico confirma o seu apoio ao evento tecnolóxico Mobile Week Ourense
venres, 3 de setembro do 2021
A
asociación
Red Mundo Atlántico achegará ao seu apoio ao evento tecnolóxico
Mobile Week Ourense. Mundo Atlántico formalizou a súa
colaboración cun acordo asinado entre o seu presidente, Mario
Gómez-Ulla, e o seu homólogo da Deputación de Ourense, Manuel
Baltar. Segundo fixo saber Baltar, a primeira edición ourensá da
Mobile Week celebrarase entre os días 19 e 23 de novembro,
“vencellando de xeito directo o noso territorio coa innovación e
outorgándolle unha visibilidade de primeira orde no ámbito da
vangarda tecnolóxica internacional”.
O
presidente provincial subliñou a importancia deste acordo, en tanto
supón un paso máis cara a organización en Ourense da Mobile Week
logo da sinatura o pasado 29 de xuño, no marco do Mobile World
Congress 2021 e co director executivo (CEO) de Mobile World Capital
Barcelona, Carlos Grau, do convenio de colaboración que permitirá
celebrar este evento en Ourense nos anos 2021, 2022 e 2023. “Trátase
dunha extraordinaria oportunidade para achegar a tecnoloxía aos
cidadáns a través dun evento que, desde a súa primeira edición en
2017, xa é un espazo de referencia, debate, reflexión e
participación en torno á transformación dixital”, explicou.
Red
Mundo Atlántico é unha entidade que, como impulsora de contidos,
colabora coa Mobile World Capital Barcelona, titular da marca Mobile
Week. Co convenio asinado, a Deputación e maila asociación
traballarán de modo conxunto para involucrar á sociedade ourensá
(o tecido empresarial e tamén os particulares) na celebración deste
evento.
Amais,
o documento recolle outras vías de colaboración para desenvolver
actividades e proxectos vinculados á 5G, a implantación de
tecnoloxías emerxentes en Ourense, a aceleración de startups,
o fomento do emprendemento conectando ciencia e tecnoloxía e o
deseño de iniciativas que axuden a formar a profesionais en
habilidades dixitais.