R suma novos fogares e empresas de Teo e Ames á cobertura da súa fibra óptica avanzada
venres, 11 de decembro do 2020
A
operadora galega R aumentou a cifra de fogares e negocios de Ames e
Teo con posibilidade de conectarse á súa fibra óptica FTTH (polas
súas siglas en inglés, fibra até o fogar). Os habitantes dos
núcleos das Punxeiras Altas e Carballido, en Ames, e na rúa de
Francos, en Teo, xa dispoñen de accesos ultrarrápidos a Internet de
até 500 Mbps e poden desfrutar doutros servizos avanzados de
telecomunicacións grazas ás redes de nova xeración de R. O
despregue destes equipamentos levouse a cabo “aproveitando ao
máximo as infraestruturas destes lugares”.
Deste
xeito, preto de 64 novos fogares e negocios de Ames e 40 de Teo
ficaron preparados para recibir os servizos avanzados de teléfono,
Internet de ata 500 Mbps simétricos e televisión dixital multicanle
de R. Segundo informou a operadora, ao peche de ano estaremos a
falar, nos dous concellos, dun total de 924 novas residencias
particulares conectadas ás súas redes de última xeración (453 en
Ames e 471 en Teo).
O
operador galego lembra que leva anos investindo no fornecemento de
rede nos dous municipios da comarca de Compostela, alén do Plan
Avanza. Así, a día de hoxe xa dispoñen da cobertura das redes de
nova xeración de R un total de 14.604 fogares e empresas de Ames e
4.050 de Teo.
Estas
e outras actuacións na provincia da Coruña forman parte dun dos
tres proxectos do Plan PEBA-Avanza do Ministerio de Economía e
Empresa dos que R resultou adxudicataria en 2018 para despregar,
antes de 2021, a tecnoloxía FTTH en 512 núcleos de Galicia que non
dispoñan de alta velocidade ata o momento (“zonas brancas”).
No
desenvolvemento dos tres plans investiranse un total de 10M€, dos
cales preto de 8M€ serán subvencionados polos fondos FEDER da
Unión Europea.
En
concreto, o despregamento nos ditos concellos da área compostelá
encádrase no proxecto destinado á extensión de redes de nova
xeración en 154 núcleos de municipios do noroeste de Galicia (A
Coruña, norte de Pontevedra e oeste de Lugo). Para estas actuacións,
cun investimento total de 2,6M€ destinarase unha axuda dos fondos
FEDER de 2,09M€. Un segundo proxecto fala igualmente do
fornecemento de banda larga de nova xeración con tecnoloxía FTTH,
desta volta en 162 núcleos do centro-oeste de Galicia (norte de
Pontevedra, sur da Coruña e oeste de Lugo). O investimento total
neste caso é de 3,58M€, 2,86 deles subvencionados polos fondos
FEDER da Unión Europea. O terceiro dos proxectos adxudicados
desenvolverase en 196 núcleos doutros municipios do suroeste de
Galicia (Pontevedra). A cobertura nestas zonas suporá un
investimento total de 3,75M€, cunha subvención dos fondos FEDER de
máis de 3M€.