R repite á fronte das empresas do sector con menor número de reclamacións
venres, 21 de outubro do 2011
O operador galego R
vén de situarse, por terceiro ano consecutivo, na parte máis alta
da listaxe de empresas do sector das telecomunicacións que menos
queixas reciben na súa actividade no mercado estatal. O dato,
reflectido por
R na súa web nun artigo que compara a actividade da compañía
galega coas das grandes corporacións, extráese do informe do
primeiro semestre de 2011 publicado pola Oficina
de Atención ao Usuario das Telecomunicacións (OUAT) do
Ministerio de Industria.
Segundo apunta a firma galega, tomando
como base este estudo e cotexando os datos de R cos das queixas
presentadas perante a OUAT por cada 10.000 clientes medios das
grandes compañías do sector, “o operador
galego é o que menos reclamacións rexistra en 2009, en 2010, e no
primeiro semestre de 2011 nos servizos de teléfono fixo, móbil,
internet, voz, datos e atención ao cliente”.
Ao fío destes datos, e xa nun plano máis específico, dicir que a
partir das mostras de 10.000 clientes de cada empresa, no apartado de
telefonía fixa, R rexistra 0,10 reclamacións nos primeiros seis
meses do ano (0,16 en 2010), fronte ás 3,41 de empresas como Ya.com,
neste punto concreto o que máis reclamacións motiva. No eido dos
móbiles, as queixas dos clientes de R son de 0,7, fronte á taxa de
3,49 que achega Vodafone na parte máis alta da táboa. Nos servizos
de voz e datos, R acumula 0,27 (a moita distancia das 6,01 de
Ya.com). En atención ao cliente en internet non houbo reclamacións
na dita mostra de 10.000 clientes.