R pon a disposición das empresas unha plataforma dixital de formación
martes, 9 de xuño do 2020
A
operadora galega R presentou esta
semana unha plataforma dixital de formación onde as empresas da nosa
terra poderán compartir cos seus empregados recursos de capacitación
e adestramento tanto de tipo motivacional como tecnolóxico. Segundo
explica a compañía de cable, trátase dun xeito de impulsar os
plans de formación do tecido produtivo e de achegar unha ferramenta
de utilidade na situación actual, “na que a maior parte das
compañías galegas adoptaron o teletraballo como forma de manter os
seus servizos durante a crise”. A plataforma é unha realidade
grazas ao acordo de R coa firma Fit Learning.
Grazas
a esta alianza, construíron unha solución “moi práctica” na
que, mediante vídeos breves, impártense contidos de utilidade, “non
soamente para esta época de crise, senón para calquera momento do
ano”, explican, engadindo que con esta plataforma “as empresas e
os seus equipos poden elixir os contidos que mellor se adapten ás
súas necesidades, acordes ás das compañías nestes momentos e que
abranguen temáticas moi variadas”.
Entre
as temáticas que R pon a disposición das súas empresas clientes
atópanse as seguintes: a ciberseguridade; as recomendacións para
teletraballar; as potencialidades das ferramentas Office 365,
Microsoft Teams, Windows 10, One Note 365; o regulamento de
Protección de Datos, a sensibilización en igualdade de xénero, os
hábitos de vida saudábel, a negociación ou a motivación.
Esta
iniciativa de R Empresa nace de “escoitar as necesidades das
organizacións clientes, que nestes momentos”, segundo explica a
operadora, “requiren ofrecerlles aos seus equipos unha
actualización dos seus coñecementos e un acompañamento en formato
remoto e dunha forma segura”.