R e SyFy traen este sábado á Coruña ao director Nacho Vigalondo
venres, 15 de febreiro do 2013
O operador galego R e a
canle temática especializada no xénero da ciencia ficción, SyFy,
van organizar este sábado 16 de febreiro un evento conxunto en
exclusiva para os clientes da TV da compañía con sede na Coruña.
Trátase, máis polo miúdo,
dunha cita co cineasta Nacho Vigalondo e os seus compañeiros
colegas Raúl Minchilena, Señor Ausente e Rubén Lardín, que
falarán na dita cidade galega do filme O ataque da quenlla de
dúas cabezas, incluída no catálogo de SyFy e dirixida por
Christopher Ray en 2010.
A cita cinéfila
desenvolverase no auditorio do Centro Sociocultural Novacaixagalicia
da Coruña a partir das 21:30 horas. O aforo, informa R, ficará
cuberto polos clientes de televisión do operador galego que se
inscribiron na web da compañía, previamente, para participar na
cita cinematográfica. “Trátase”, sinala R, “de
xuntármonos en boa compaña nunha sesión
cinematográfica especial e animada, compartindo co público os
comentarios máis atrevidos e curiosos que se lles ocorran”.
