R conmemora o Día da Protección de Datos cunha serie de consellos sobre a nosa información sensíbel
xoves, 27 de xaneiro do 2022
Este
venres 28 de xaneiro celébrase o Día Europeo da Protección de
Datos e a operadora de orixe galega adheriuse ás conmemoracións
facendo unha proclama a prol dunha Rede segura e de meirandes
esforzos para garantir unha cultura de bo uso dos servizos dixitais.
En palabras de Susana Rey, especialista en ciberseguridade e
privacidade e membro da Oficina de Protección de Datos de R, “para
unha vida boa é esencial salvagardar a nosa información sensíbel”.
Isto podemos conseguilo cunha formación crítica compartida “que
nos permita tomar decisións axeitadas en cada caso”.
Segundo
engade, os nosos datos persoais “son susceptíbeis de utilizarse
para fins que poden ter impactos verdadeiramente desagradábeis nas
nosas vidas: perdas económicas, suplantacións de personalidade,
publicación de información íntima, recepción de múltiples
comunicacións comerciais... etc”. Polo tanto, di, resulta
“esencial que salvagardemos con celo a nosa información sensíbel”.
Algúns
consellos para protexernos na Rede
A
respecto de todo o devandito, a experta de R en PD ofrece unha serie
de consellos:
_Ante
o vicio de pedir, a virtude de non dar. En contornas dixitais
adoitamos dar os nosos datos sen pensar que seguramente non sexa
necesario facelo. Aínda que non haxa mala intención en quen os
pide, ante algún problema de ciberseguridade eses datos poden
rematar en malas mans e implicar problemas serios para nós. Por iso,
como punto de partida neste terreo hai que asimilar que “menos é
máis: menos datos, máis seguridade”, sinala Susana Rey.
_Seguinte-seguinte...
e despois?. Se nos habituamos a aceptar todas as condicións de
privacidade dunha web, servizo, aplicación móbil, e facémolo de
xeito automático, podemos estar a dar permiso para que utilicen os
nosos datos con fins que non compartimos e/ou impliquen riscos que
descoñecemos. Hai que ler a información de privacidade, obrigatoria
en todos os casos, e pensar se nos interesa ou non aceptala. “Se
non existe esa información ou é incompleta, estraña ou
inintelixíbel... desconfiemos”, apunta a experta de R.
_Nada
é de balde. Cando un servizo, web, aplicación... non nos cobra
polo seu uso, é probábel
que
esteamos ao pagar cos nosos datos. Trátase de valorar se nos
compensa que unha empresa poida saber, por exemplo, onde estamos en
todo momento a través do noso móbil, a cambio dunha aplicación que
nos mostra a dirección exacta a Cuenca. O caso das redes sociais e
os menores é especialmente delicado. Susana Rey incide en que
“sempre resulta arriscado expor a nosa información sensíbel en
redes sociais e en Internet, e moito máis se é de terceiras persoas
e sobre todo de menores. Na actualidade, a súa sobreexposición
pública e os temas de sexting ou bullying en redes
sociais constitúen un problema serio para moitos/as nenos/as e
adolescentes, con consecuencias gravísimas nalgúns casos. É
preciso educar xa os/as máis pequenos/as na necesidade de ser
responsábeis cos seus datos e cos dos/as demais, tomando ao tempo
unha actitude belixerante fronte a este tipo de actuacións
doutros/as cando as atopemos”, explica.