Quempallou estrea web
mércores, 9 de febreiro do 2011
A banda Quempallou está estes días en boa
parte dos medios galegos por varias razóns. A primeira, polo menos a que máis
nos toca de preto, é a posta en marcha da súa nova páxina web, un sitio que conmemora os once anos
de dedicación artística do grupo (11 anos
mallando, como eles din) e que serve de porta de entrada 2.0 cara a todo o
relacionado coa banda: orixes, traxectoria, discografía, entre outras cuestións.
Tamén inclúe accesos directos aos sitios propios en Facebook, Twitter, MySpace e
iTunes. Amais disto, pon en xogo unha escolma de imaxes e vídeos que de seguro
irá sendo obxecto de novas e constantes incorporacións ao longo dos moitos anos
de foliada que aínda que lle queda a Quempallou.
Importante tamén ter en conta a sección Concertos, na que se dá conta disto último:
de todo que está por vir. Porén, a banda tamén está estes días nos medios por
motivos máis estritamente ligados ao seu, concretamente pola publicación do seu
novo disco, Once anos mallando (Zouma Records), unha escolma do mellorciño da súa
discografía. Segundo conta Roi Maceda, integrante da agrupación, achega non é unicamente o máis
representativo do repertorio de Quempallou, senón que tamén constitúe unha
recompilación daquela parte do seu catálogo de cancións que máis e mellor
funciona en directo. “Os temas máis
axeitados para ver a evolución da banda”, explica.