Qualcomm achegará conectividade 4G a móbiles básicos

Qualcomm anunciou hoxe e Nova Delhi unha nova xeración de procesadores móbiles, os Qualcomm 205, que sorprenden por servir para levar conectividade e servizos 4G a teléfonos básicos, ou sexa, que todos eses móbiles que non chegan a ser smartphones, poderían gozar das elevadas velocidades de acceso á Rede mediante banda larga móbil e Wi-fi, así como gozar das melloras en calidade de audio que ofrecen as novas redes (VoLTE) buscando así satisfacer a demanda de móbiles básicos en mercados emerxentes como a India, América latina e o sueste asiático.
A plataforma Qualcomm 205 combina o uso dun modem LTE Snapdragon X5 que permite velocidades de descarga de 150 Mbps e de subida de 50 Mbps (aí como comunicacións con tecnoloxías de banda larga móbil de anteriores xeracións) e servizos de voz sobre LTE e Wi-Fi, conectividade a redes sen fíos (até Wi-Fi N), Bluetooth 4.1, GPS e USB 2.0, podendo equiparse con procesadores de até dobre núcleo a 1,1 GHz e memoria LPDDR2/3 até a 384 MHz, pantalla cunha resolución VGA e cámara de até 3 Mpíxeles con gravación de vídeo até 480p, ou sexa, unhas prestacións claramente insuficientes para un smartphone, pero máis que dabondo para un móbil básico, que busque principalmente empregarse para chamadas de voz e poida gozar dunha autonomía de varios días cunha única carga.
Qualcomm confía en que esta nova plataforma chegue aos consumidores durante o segundo trimestre do ano.