Pulo no noso país ao desenvolvemento de servizos e contidos dixitais educativos
xoves, 10 de febreiro do 2011
O Ministerio de
Industria, Turismo e Comercio, a través da Estratexia 2011-2015 do Plan Avanza2
do Goberno central, pretende situal a España nunha “posición de liderado no desenvolvemento e uso de produtos e servizos
TIC avanzados” que, entre outras cousas, melloren o benestar e a calidade
de vida da cidadanía.
Do mesmo xeito,
a Consellaría de Educación da Xunta, tamén quere situar ao noso país (ou máis
concretamente ás entidades académicas do noso país) “nunha
posición de liderado” a través do Proxecto Abalar co que está a dotar ás
aulas galegas das infraestruturas tecnolóxicas máis avanzadas do panorama
actual.
Ambas
entidades, xunto co Ministerio de Educación, veñen de asinar un convenio de
colaboración mediante o cal se comprometen a desenvolver servizos públicos
dixitais no ámbito educativo, que leva por nome Educación en Rede, e que se
enmarca no Progama Escola 2.0.
A firma deste
documento trilateral permitirá, entre outras cousas, reducir a fenda dixital
existente na nosa comunidade educativa, así como fomentar o desenvolvemento de
proxectos de implantación TIC que melloren as condicións de ensino dos nosos
nenos e nenas. Asemade, permitirá deseñar novo modelos de negocio para darlle
pulo ao desenvolvemento da industria española tecnolóxico-educativa, e impulsar
o uso eficaz das infraestruturas, aplicacións, contidos educativos e de
capacitación existentes en Galicia.
O convenio
prevé un investimento de preto de 3 millóns de euros que servirán, entre outras
couas, para capacitar á comunidade educativa no uso das ferramentas TIC
dispoñibles, para instalar novas aulas dixitais en centros públicos, para dotar
das infraestructuras específicas ás zonas rurais e menos desenvolvidas e para
reforzar as instalacións tecnolóxicas existentes nos centros.
En definitiva, estas
axudas contribuirán a aumentar o desenvolvemento dos servizos públicos dixitais
do ámbito educativo galego e dotarán ás aulas galegas (dende 5º de primaria ata
2º da ESO) de lousas dixitais interactivas, videos
proxectores e ordenadores con conexión a Internet.
Tamén se prevé,
mediante este convenio, a integración das TIC na educación preuniversitaria, de
maneira que, co tempo, as devanditas entidades públicas xuntarán esforzos para
levar as TIC a todo o ámbito educativo sen excepcións así como conexión á Rede
de calidade en tódalas escolas e centros de ensino públicos.