Pulo definitivo ao viveiro de empresas de tecnoloxía aeroespacial de Vigo
venres, 27 de setembro do 2013
Teresa Pedrosa, delegada
da Zona
Franca de Vigo, Javier Collado, director xeral do INCYDE e José
García Costas, presidente da Cámara de Comercio Industria e
Navegación de Vigo, asinaron hoxe un convenio de colaboración entre
as tres institucións para promover a consolidación do viveiro de
empresas especializado en tecnoloxías do espazo: o Spain Business
Aerospace Incubator (SBAI), un proxecto que xa dispón de dous
millóns e medio de euros de capital (Fondos FEDER) e outros 500.000
da man do Consorcio. A iniciativa diríxese a potenciar a creación
na área da cidade galega de empresas punteiras no desenvolvemento de
aplicacións provenientes da investigación aeroespacial. Segundo
informaron, dispón xa do financiamento necesario para a súa posta
en marcha en 2015.
Ademais dos aspectos
financeiros, o convenio asinado ten por obxecto establecer as liñas
de colaboración entre as institucións coa intención de descubrir e
fomentar iniciativas empresariais e potenciar o tecido empresarial
máis acorde coas novas estruturas tecnolóxicas e organizativas e
promover a transferencia de tecnoloxía do espazo ás empresas.
Teresa Pedrosa agradeceu
a colaboración de Cámara e INCYDE e resaltou o feito de que en
Porto do Molle 18 emprendedores comezarán a súa actividade en
outubro. O director xeral do INCYDE puxo de manifesto que hoxe tivera
dúas boas novas: “A sinatura deste convenio co que o 31 de
decembro de 2015 como data límite, Vigo disporá da primeira
incubadora do sur de Europa destas características e, ademais, saber
que o viveiro de empresas multisectorial de Porto do Molle nun mes
abrirá as súas portas cun 80 por cento de ocupación”. García
Costas, pola súa banda, salientou a política de apoio a
emprendedores como a mellor forma de acadar que novas empresas nazan
creando emprego e riqueza e, nesa liña, destacou a colaboración
entre a Cámara e o Consorcio que lograron o apoio do INCYDE para a
consecución de fondos europeos.